Lawngtlai District-ah Road Safety Week

0
511
views

Lirtheia chetsual lohna tura fimkhur hapta, Road Safety Week chu vawiin atang khan Lawngtlai District-ah hman a ni. He hapta hi DC Conference Hall-a inkhawmah Bawrhsap, Dr Arun T-in a hawng a, thu sawiin Bawrhsap chuan mihring tam tak thihna thlentu chu lirtheia chetsualna a ni tih sawiin chetsualna pumpelh nan lirthei khalhtute chu fimkhur turin a ngen a, lirthei khalh dan tha taka zawma hawihhawm taka awm turin a fuih bawk. Bawrhsap chuan chetsualna thlen palh thulha hliamte bawihsawm dan leh enkawl dan thiam tel tum turin mipuite a ngen a ni. He hapta hawnnaah hian Lawngtlai SP, Pu Lalsanglura pawhin thu sawiin, lirtheia chetsualna chhan tam ber chu dan zawm loh vang niin a sawi a, dan zawm turin lirthei khalhtute chu a ngen bawk a ni. He inkhawm hi Lai Autonomous District Council-a Transport Officer, Pu F. Lalhmachhuana’n a kaihruai a, district dang ruala nimina an hman lohna chhan chu Mizoram Larsapin Lawngtlai a tlawh vangin niin a sawi a ni. Lawngtlai District-a Road Safety Week hman chhung hian Traffic Police leh Transport Deptt.-a Enforcement Staff te chuan motor leh a khalhtute enfiah hna an thawk dawn a, driver tha ber, traffic police tha ber leh motor fai ber thlan chhuah a ni ang a, lawmman pek an ni ang.