Lok Sabha inthlanpuia vote thlak thawh 5-na neih turah campaign theih hun vawiin khan khar a ni.

0
298
views

PM Narendra Modi chuan Uttar Pradesh-a Partapgarh leh Basti-ah vantlang inkhawm a huaihawt a, Bihar-a Valmiki Nagar-ah mipui hmaah thu a sawi bawk a ni. A thusawinaah hian Modi chuan Samajwadi party leh Congress te chu Mayawati phatsanah a puh a, Congress-in an sorkar laia mifirfiak te laka beihpui an thlakna an tarlan chungchangah Modi chuan a sorkar hnuaia beihpui thlakna congress in an sawisel chiam hnuah an sorkar hun laia an hmalakna an puangzar leh chiam si chu thil kalphung ni lo a ni a ti a, congress party chu video games-a intihsiakna nen ngaihpawlhah a puh a ni.

Rahul Gandhi chuan Amethi-a Korwa-ah Congress Mahila Workers te a kawm a, hemi hmalam hian press conference a nei bawk a, hetah hian PM Modi chu ram tana pawimawh ber, mipuite eizawnna tur hna pek chungchang leh loneitute hmakhua ngaihsak a hneka an hmakhua tichhia-ah a puh a, Modi chuan ram venhimna chungchang inchhuan nan hmang \hin mahse a thawktu tak chu ram sipaite an ni a ti a, kum 70 chuang sipaite an hna an thawk tawh a, hengah hian Modi chu a inrawlh lo a ni a ti a, sipaite chu Modi ta bik an ni lo a ni a ti.

Modi-a’n Congress sorkar hnuaia mifirfiak laka beihpui thlakna video games nena a tehkhinna chu Congress ni loin ram sipaite a hmuhsit zia a tihlanna zawk a ni a ti. Rahul chuan sorkarna an chang a nih chuan Modi sorkar aia ruahmanna \ha zawk nen, khauh zawkin mifirfiakte an beih tur thu a sawi a, Masood Azhar-a chu mifirfiak hremna pek tlak a nih thu sawiin BJP sorkarna hnuaia Pakistan-a thawn let a nih thu a sawilang a ni.
Supreme Court-a a thubuai chungchangah court hnenah ngaihdam dilna pe mahse a thil sawi “Ram vengtu chu rukru a ni” tih chu dawt a nih loh thu a sawi a ni.

BJP President Amit Shah chuan Fatehpur-ah vantlang inkhawm a huaihawt a, Union Minister Smrit Irani \awiawmin Amethi-ah road show a huaihawt bawk a ni. Lucknow-a ding tur Union Home Minister leh BJP hotu Rajnath Singh chuan Dhaurahra leh Mohanlalganj-ah a campaign bawk a ni.

Vote thlak thawh 5-naah hian state 7-a bial 51-ah Thawh\anni hian mipuiten vote an thlak ang.