Lok Sabha member nilai, Pu CL. Ruala’n BJP kaihhruai NDA-in India rama kum 5 ro an rel chhungin Kristian leh Muslim-ten harsatna nasa tak an tawk niin a sawi.

0
484
views

Sakhaw zalenna duhtu zawng zawngin MP thlannaah BJP leh an thawhpui MNF Party candidate hnawl a, mipui candidate, Pu Lalnghinglova Hmar an vote vek a ngai niin Pu CL Ruala hian vawiina Congress Bhavan Aizawla thuthar lakhawmtute a kawmnaah a sawi. Pu CL. Ruala chuan, BJP chu India rama Hindu lal ram din tumtu nia sawiin India a\anga chhuak ni ve lova an ngaih Kristian leh Muslim lakah nasa takin hlei an len niin a sawi a, hemi avang hian tun \uma Lok Sabha inthlanpui hmachhawn mekah pawh Citizenship Amendment Bill chu thu inchuah lian ber a ni ta hial a ni, a ti a. Kum 2016-a BJP sorkar-in Parliament-a CAB an putluh khan eptuten an hre ve chiah tih sawiin, he Bill hi Congress Party chuan a tir a\angin a dodal nghal a ni a ti.

CAB hi House-a sawi hoa vote lak a nih chuan a tlang nghal dawn tih an hriat avangin a tihkhawtlai dan an zawng a, an rawtna angin a zirchiangtu tur Committee din niin, hun engemawchen tih khawtlai a ni a, tun thlasik \hutkhawma Lok sabha-a pass a nih dawn pawh khan Congress member-te chu House-ah an awm ve lo a niin Pu CL Ruala chuan a sawi. Dan pangngaiah chuan he Bill hi Rajya Sabha-a pharh a nih tak loh avangin zuih ral tur ni mah se, BJP President, Amit Shah-a’n BJP an sorkar leh a nih chuan he Bill hi tharthawh leh a nih tur thu a sawi avangin hei hi tharthawh lova a thamral theih nan BJP chu paih an ngai a, Mizoramah pawh rorel lai MNF chu BJP thlawptu an nih avangin mipuiten an hnawl ngam a ngai niin a sawi.

Pu CL. Ruala chuan, MNF President, Pu Zoramthanga’n CAB chungchang Prime Minister leh Union Home Minister a sawipui tawh tih a sawi chu \ha viau angin lang mah se, he Bill hi Parliament pawn lama dodal chi a ni lo tih hriat a ngai a ni, a ti a. MNF MP Candidate Pu C. Lalrosanga pawhin he Bill a dodal tur thu a sawi chu thil a hriat chian tawk loh vangah puhin, tling pawh ni se a \hutna tur chu BJP lam a nih avangin CAB dodal zawnga a \awng a nih ngat chuan rei loteah an pawt \hu nghal mai dawn niin a sawi a, CAB a taka dodal turin mipui candidate, Pu Lalnghinglova Hmar chu a tlin ngei a ngai niin a sawi.

Pu CL. Ruala hian kum 10 chhung Mizoram aiawha Lok Sabha member anih chhunga mipui, sorkar hnathawk leh an party hotute thlawpna \ha tak a dawng chu a lawm hle tih a sawi a, MP a nih chhungin Parliament \hutkhawmnaa tel \ha ber leh Model Village thlan kawnga hnathawk \ha ber anih thu sawiin MP kaihhruaina hnuaia District hrang hranga sorkar hmalak dan viltu, District Development Coordination and Monitoring Committee-ah Mizoram chu hnathawk \ha zual 3 zingah thlan a ni bawk tih a sawi.