Lunglei Pukpui-a Observation Home & Special Home sakna tur lungphum Social Welfare Minister Pu PC Lalthanliana’n nimin chawhnu khan a phum. He building hi Rs 4,00,00,000/- senga sak tur a ni. Lungphumna inkhawma thu sawiin Pu PC Lalthanliana chuan Social Welfare Department chuan Sorkar Laipui Scheme hrang hrang chak takin a kalpui mek tih a sawia, Scheme thenkhat chu Sorkar Department dangte nena inpui tawna kalpui a ni tih sawiin Social Welfare Depatment chu Department dangte tan malsawmna thlentu niin a sawi. Minister chuan Observation Home & Special Home chu mipa naupang kum tlinglo sual kawng lo zawh tawh te awmna tur leh an hun kal zel tha taka an hman theih tawhna tura insiam thatna tur niin a sawia, an insiam that theih nan he Home-ah hian kum 3 thleng pawh an awm thei dawn niin a sawi a ni. a ni, a ti. Minister chuan Observation Home & Special Home-a awmte tan hian infiamna hmun tha tak siam sak an nih dawn bakah a chhunga awmte an tlanchhuah theih loh nan compound hungna tha taka siam a nih tur thu a sawi bawk a ni. He Home sak tur lungphumna inkhawmah hian Lunglei West bialtu MLA Pu Chalrosanga Ralte pawh telin, sorkar hnathawk te, tlawmngai pawl, khawtlang hruaitute, Lunglei MJA hruaitute leh mipui thahnem tak an tel a ni. Inkhawm hi Social Welfare Joint Director Pi Vanlalpianpuii’n kaihhruai a ni.
