Maharashtra politics boruak chiri tak-ah Supreme Court in sorkar fiahna nei tura thupek a siam hnuah Inrinni-a lakluh BJP Chief Minister Devendra Fadnavis leh NCP hruaitu Dy CM Ajit Pawar ten banna an thehlut a, Shiv Sena, NCP leh Congress \ang hovin sorkar an siam dawn.

0
28
views

BJP leh Ajit Pawar-a kaihhruai NCP member \henkhatin Inrinni-a sorkarna an siam thut dan chu eptu pawlten khingletin Supreme Court-ah minute 80 chhung ngaihtuah a ni a, Supreme court hian sorkar fiahna Floor Test nei tura thupek a chhuah hnuah Ajit Pawar hi Dy CM a\angin a inhnukdawk nghal a. CM atana lakluh Devendra Fadnavis pawhin banna a thehlut ve nghal a ni.

Devendra Fadnavis hian Maharastra Assembly inthlanpuiah mipuiten BJP leh Shiv Sena \angdunte hnehna chantir mahse, inthlanna zawhfel vek tawh hnuah Shiv Sena Party chuan Chief Minister nihna in chelh chhawk an phut tak avangin an inrem thei ta lo tih a sawi a, Chief Minister in nih chhawk chungchang hi BJP in a tiam ngai lo a, campaign lai pawhin chiang taka sawi a ni a ti a, sorkarna siam theih anih tak loh avanga President’s Rule-a Maharastra dah a nih hnuah Ajit Pawar chuan BJP thawhpui a remtih avangin BJP chuan sorkar a siam a, Ajit Pawar hian Dy CM a\anga a banna a thehluh leh tak avangin BJP chuan sorkar siam theihna khawp MLA a nei ta lo tih a sawi a, hei vang hian CM anihna a\anga banna a thehluh tur thu sawiin, Shiv Sena, NCP leh Congress \angho din sorkar thar ding tur chu duhsakna an hlan tih a sawi.

Maharashtra Assembly inthlannaah BJP leh Shiv Sena party te an \ang dun a, amaherawhchu, inthlan result a chhuah hnuah Chief Minister in nih chhawk Shiv Sena in an phut avangin sorkar siam turin an inrem thei lo a, hemi hnu hian Shiv Sena, NCP leh Congress te chuan \ang hova sorkar siam an tum mek laiin rin loh takin Maharashtra Governor, Bhagat Singh Koshyari chuan Devendra Fadnavis leh Ajit Pawar te chu Chief Minister leh Deputy Chief Minister atan Inrinni khan a la lut thut a. Ajit Pawar hian NCP MLA ten an thlawp nia a sawi laiin, NCP hotupa Sharad Pawar erawh chuan a tupa Ajit Pawara hmalakna chu NCP in a pawmpui lo a ti thung a, Shiv Sena, NCP leh Congress te hian a huhovin Supreme Court-ah Governor thil tihdan hi an khinglet ta a ni.

Maharashtra-a tual\o party Vikas Aghadi MLA te chu Mumbai khawpui daia 5 star hotel-ah inhmukhawmin, khua leh tui \ha, ram tana mi rinawm ni turin an intiam a, ham\hatna engpawh vanga an party chhuahsan lo tur te, engti kawng zawng pawha BJP \anpui lo tur te leh an party phatsan lo tur te in an intiam a ni.