Manipur Assembly Speaker-in MLA-te party danga inleh chungchang sawiho phal lo, eptu pawl chhuak tau

0
375
views

Manipur Speaker Yumnam Khemchand-a’n MLA-te party danga inleh chungchang sawiho a remtih loh vangin vawiin Assembly rorel inkhawmah eptu pawlte an chhuak tau. Nikuma Manipur inthlan-ah khan party mal chak zo an awm loh vangin, BJP leh tualchhung party pathum, NPP, NPF leh Lok Janshakti Party-te chuan thawhhona thu thlungin sorkar an siam a, BJP hian seat 21 an lak laiin, eptu pawl lian ber, Congress chuan seat 28 an la a, sorkar thar siam a nih hnu lawkah, Congress MLA, T Shyamkumar chuan BJP a zawm leh avangin, a chungchang ngaihtuah thuai turin eptu pawlte chuan an phut a ni. Congress MLA A Mirabai chuan Assembly chu ram danpui venghimtu tur ber a nih thu sawiin, Congress atanga thlan tlin, BJP sorkarin Minister-a a ruat chu dan kalh a nih thu te leh, hemi chungchang Speaker-in sawi a remti lo chu thil dik lo lian tak nia a hriat thu a sawi a ni. Khemchand chuan State Finance Minister, Y Joykumar-a’n Budget a pharh lai a nih vangin, thil dang rel a rem loh thu leh tum danga an thutkhawm aia an buai vanga Shyamkumar chungchang chu sawi remti lo a nih thu a sawi thung a ni. Congress atanga BJP zawm leh ta hi Shyamkumar chauh hi a ni lo a, a hnungzuitu, MLA dang 8 lai an awm a, heng MLA-te leh State sorkar hnuaia Parliamentary Secretary hna chelh tir, midang 12-te chu bang turin Congress chuan an phut a, an president TN Haokip pawhin an thil phutte hi state larsap, Pi Najma Heptulla leh Speaker hnenah hian a thehlut tawh tih a sawi.