Live Update|March 29|Covid-19 chungchang thu thar lakkhawm

0
1403
views

He live blog hi tihtawp a ni tawh a, March ni 30 live blog en duh tan;
https://www.zonet.in/marc30-liveblog-covid19/


11:32 PM
Indian Forest Service training zinga pakhat, zirtawpnia test negative-a ngaih tawh chu vawiin khan a positive leh

11:28 PM
Mission Vengah hnam dang pakhat chu a inluahah thia chhar a ni, Aizawl Civil Hospital-ah postmortem tura lak a ni a, sample pawh zirchian tura lak a ni

11:27 PM
DoNER Minister, Dr Jitendra Singh chuan India hmarchhak state hoah bungrua leh nitin mamawh phur thlawhna bak thlawhna dang kal a awm rih dawn loh thu a sawi

11:13 PM
France-ah COVID-19 vanga thi mi 292 an awm belh a, he rama COVID-19 vanga thi zawng zawng chu 2606 a ni.

11:11 PM
Amritsar-ah kum 62 mi pa pakhat COVID-19 vangin a thi a, hei hi Punjab-a COVID-19 vanga thi pahnihna a ni

11:02 PM
AMC area chhungah pawna chhuah khapna tihchhuahin a tarlan tawh bakah, a hnuai amite huam tel tawh lo tih Aizawl District Magistrate thuchhuakin a tarlang;

  1. P&E Department hnuaia Power Supply buaipuitu
  2. Damdawi (wholesale & retail) leh COVID-19 kaihhnawih bungraw zuar
  3. Mipui mamawh tui phur
  4. Ran chaw zuar
  5. Private Security Service

10:24 PM
Delhi-a sorkar hnathawk pahnih chu an mawhphurna hlen lovah sorkar laipuiin a puh avangin an hna atangin chawlh lailawk (suspend) an ni a, officer dang pahnih insawifiah tura tih an ni bawk

10:18 PM
Mizoram: COVID-19 laka Jail tangte him theihna tur ngaihtuahtu tur committee din a ni. Jail tangte tlawh theih an ni rih lo a, an chhungte an biakpawh theihna tur phone jail thenkhatah dah a ni tawh a, dah belh zel tum a ni. Central Jail0in doctor an nei tawh a, district jail-te pawh doctor-te’n an tlawh thin a, bail dil mekte chungchang Court-in a ngaihtuah chhunzawm ang. Jail-ah te hian inkhunghranna hmun siam tho tur a ni a, tang zinga upa leh hrisel lo zawkte enkawlna tur ruahman a ni bawk. Central Jail, Champhai District Jail leh Lunglei District Jail-ah dawn zawh aia tam tang an awm mek avangin, tih tlem dan tur ngaihtuah a ni bawk.

10:14 PM
Lunglei District Sitrep: Mahni ina inkhunghrang (home quarantine) 579 an awm a, Lunglei khawchhung bikah mi 416 an awm a, sorkar Quarantine Facility-ah mi 13 an awm mek, quarantine zingah hian mi 8 chu ram pawn atanga lo haw an ni a, tun dinhmunah chuan harsatna nei an awm rih lo a, Quarantine zo tawh mi 49 an awm bawk a ni

10:06 OM
Andhra Pradesh-ah COVID-19 case thar 2 a awm a, case awm zawng zawng 21 a tling tawh

9:59 PM
Iran atanga India khua leh tui phurh haw 275-te chu Jodhpur thlenpui an ni

9:00 PM
Germany-a ram bung pakhat, Hesse-a Finance Minister Thomas Schaefer chu rel kawngah thia chhar a ni a, amah a intihlum nia hriat a ni. Thuneitute chuan Schaerfer hian Coronavirus vanga an ram sum dinhmun tlahniam nasa lutuk vangin a rilru hah chu a intihlum ta mai nia an hriat thu an sawi

8:58 PM
Ram pumah COVID-19 case enkawl lai 901 a awm mek a, damdawiin atanga chhuak tawh (enkawl dam leh ram pawn lama sawn) 96 a awm mek a, mi 27 an thi tawh: Ministry of Health and Family Welfare

8:08 PM
Iran: COVID-19 vangin mi 2640 an thi tawh

8:07 PM
Indian Army-ah COVID-19 vei pahnih an awm belh a, Srinagar-ah sipai pakhat leh Kolkata-a Command Hospital-a sipai doctor pakhat te an ni

8:01 PM
Lockdown zawh ruala nunphung pangngai chhunzawm a nih theih dan tur leh ram sum leh pai dinhmunin ngai a awh leh theih dan tur te leh damdawi lam in enkawlna chak lehzual a awm theihna tur PM pisa-ah sorkar hruaitu liante an thukhawm

7:38 PM
United Kingdom: COVID-19 vanga thi zat chu 1227 a ni tawh

7:37 PM
Union Home Secretary Ajay Bhalla chuan State leh UT hrang hrang Chief Secretary-te hnenah COVID-19 beihletnaa sorkar laipui hmalakna hrang hrang hrilhfiahna a thawn. Lehkha-ah hian Home Secretary chuan mipui nitin mamawh zingah sahbon, kut silna bik sahbon, hrik thahna hlo, shampoo, thil tihfaina, insukna sahbon, ha nawhna hlo, ha nawhna leh a kaihhnawih thil dangte bakah sanitary pads leh diaper te, battery cell leh charger te pawh a tel tih tarlan a ni a, chanchinbu sem pawh “print media” in a huam avangin a sem hi phal a ni tih a tarlang bawk.

7:32 PM
Home Ministry-in lockdown laia chanchinbu sem phal a ni a tih a sawi leh

7:18 PM
Synod Revival chuan lockdown vanga inkhawm, camping leh crusade-te a rem rih loh avangin, mipui zingah ṭawngṭaipui ngai emaw, thlarau lama tuihâlna nei emaw, harsatna tawkte tan Phone-in ṭawngṭai ngai leh counselling duhte inhriattir theihna tur a ruahman a, a hnuaia phone number-ah te hian call emaw, WhatsApp emaw hmanga biakpawh theih an ni – 9862813513, 8974963343, 9436140351, 9862106488, 9612588756, 9615180611

6:59 PM
Lunglei District-a tangkhangte chungchanga DC hriattirna: Mahni khua lova tangkhangte leh State pawn atanga lo kalte list thehluh kim thuai tur a ni a, thehluh a awlsam nan Village Council WhatsApp Group-ah thawn theih a ni

6:34 PM
US-ah case 123781 a awm tawh a, thi 2229 an awm tawh. italy-ah case 92472 a awm tawh a, thi 10023 an awm tawh. China-ah case 81439 a awm tawh a, thi 3300 an awm tawh. Germany-ah case 58247 a awm tawh a, thi 455 an awm tawh. India-ah case 979 a awm tawh a, 867 enkawl lai an awm a, 87 chu enkawl dam an ni tawh a, thi 25 an awm tawh.

6:30 PM
Aizawl khawpui huam chhunga petrol pump hawn hun tur bik siam a ni a, Mizofed, Aizawl leh Lalthanzauva SS, Sairang chu darkar 24 an inhawng ang.

A hnuai ami te hi zing dar 7 atanga chhun dar 12 an inhawng ang; Lalbiakliana Filling Station, Ramhlun Venglai | Zangena & Bros., Ramhlun North | K. Lalnghakliana Filling Station, Kulikawn | Singson SS, Sairang Road| Hrangbana FS, Sairang Road | Aizawl Bypass FS, World Bank Road | Zemabawk FS, Zemabawk

A hnuai ami te hi chhung dar 12 atangin tlai dar 5 thleng an inhawng ang; RF Filling Station, Sairang Road | Lalboi FS, Hunthar | Vanlalruata FS, World Bank Road | Hauva FS, Bawngkawn

6:22 PM
Kolasib: DC Dr H Lalthlangliana hovin Kolasib district huam chhunga khualzin tangkhangte enkawl dan tur ngaihtuah a ni a, VLTF leh Essential Commodities Team ten an mamawh ei tur an ngaihtuahsak ang a, Executive Zonal Magistrate-te’n an awmna tur a ruahman ang

6:19 PM
Pradhan Mantri Garib Kalyan Package hnuaiah COVID-19 damlo enkawltu zawng zawng (healthcare provider, community health worker pawh tiamin) tana insurance scheme chu pawm a ni ta. He scheme hi ni 90 chhung hman tur a ni a, mamawhna avanga private damdawiin hnathawk pawh chawp zawng zawng pawh a huam vek a, heng miten insurance an lo neih sa tawhah belh tur a ni

6:10 PM
Board of Control for Cricket in India (BCCI) chuan Prime Minister’s Citizen Assistance and Relief in Emergency Situations, PM-CARES Fund-ah cheng vbc 51 a pe

6:05 PM
Tamil Nadu-ah case thar 8 chhinchhiah a ni a, state puma chhinchhiah zat chu 50 a ni

6:00 PM
Serie A club Juventus chuan an player-te leh an coach, Maurizio Sarri-te chuan an hlawh tihhniam lailawk rih an remtih thu a sawi, an hlawh hi hmun thuma thena hmun khat in tihhniam a ni ang. Juventus player zingah hian COVID-19 kai pathum an awm tawh a ni.

5:30 PM
Ministry of Health and Family Welfare chuan vawiin khan COVID-19 kaite leh kai nia rinhlelhte tualchhung thuneituten an buaipui dan tur ruahmanna a siam a, eng ang ambulance nge hman tur tih leh a enkawltute inpuahchah dan turte leh damlo inhlan chhawn dan turte, ambulance tih thianghlim chhunzawm dan turte leh doctor leh nurse te’n an hriat tur kimchang takin a ti chhuak a ni

5:08 PM
India-a COVID-19 confirmd case tam berna chu Maharashtra a ni a, confirmed case 196 a awm a, heng zinga 164 chu enkawl mek an ni a, enkawl dam 25 an awm tawh a, thi 7 an awm tawh bawk.

Kerala-ah chuan confirmed case 182 a awm a, heng zinga 169 chu enkawl mek an ni a, enkawl dam 12 an awm tawh a, thi 1 a awm tawh a ni

4:55 PM
Sairang: Hnam dang tangkhang mek 63 an awm a, an zinga 1 hi hmeichhia a ni a, mipa 62-te hi Rel kawng sial mektute awmna thin camp-ah awm tir an ni a, Railways lam hotute’n hnathawkte mutbu an pe a, BDO leh Local Task Force-te’n Aizawl DC atangin an ei leh in tur an ngaihtuah sak ve thung a, hmeichhia 1 hi Sairang-a Mosolman biakin enkawltute bulah a khawsa rih a, an vai hian Karimganj, Assam mi, Lunglei-a hna hrang hrang thawka inhlawhfa an ni. Sairang Local Task Force chuan heng hnam dangte hi lockdown tawp hma chu lo mikhual an inhuam thu an sawi a, tuna mi 63-te hi lirthei pakhata rawn chuang an nih thu leh lirthei dang 7 nena inthuruala an state-a haw tum an nih thu leh lirthei dang aia an tlan muan deuh vangin Aizawl an thleng hman lo nia an hriat thu an sawi bawk a ni

4:55 PM
CM Relief Fund-ah COVID-19 avanga harsatna tawkte tanpuina sum hmuh belh zel a ni a, DIPR chuan Airport Security Constable Pu RK Hmingthansanga’n a thla khat hlawh a pek bakah, Harley Owners’ Group-in cheng 50,000 an pek thu a tarlang

4:55 PM
Lawngtlai: Lawngtlai Horticulture Division-in thlai thar lakkhawm leh sem chhuan dan tur (vegetable supply chain) ruahman angin vawiin khan thingtlang khaw hrang hrang atanga a phurhkhawm thlai tharte local level task force hrang hrang henah a sem chhuak

4:53 PM
Defence Minister Rajnath Singh chuan Ministry of Defence hnathawk zawng zawng ni khat hlawh tlingkhawm PM-CARES Fund-ah chhun a nih tur thu a sawi a, hei hi hnathawkte duhthlanna a nih thu leh Fund-a pawisa chhunglut duh lo an awm a nih pawhin hriatthiam an nih tur thu a sawi bawk

4:50 PM
Maharashtra-ah kum 45 mi COVID-19 kai tih finfiah tawh pakhat a thi

4:08 PM
Spain-ah darkar 24 chhungin COVID-19 vanga thi mi 838 an awm, hei hi Spain-ah ni khata thi an la tam ber tum a ni a, he rama COVID-19 vanga thi zawng zawng hi 6528 a ni tawh a, confirmed case hi 78797 a awm mek a

3:42 PM
Zokhawthar-ah ramri khar a nih avangin mi eng emaw zat chu an tangkhang mek a, Myanmar lam pawhin a ramri a khar ve tho avangin tuilarapin an awm mek a, an zingah hian naupang pawh an awm nual a, Zokhawthar Branch YMA chuan an ei leh in tur an buaipui a, Doctor-te pawhin awmchilhin, gate phen atangin an enkawl bawk a, an dinhmun hi Home Ministry-ah Magistrate-in a thlen tawh nia hriat a ni

3:42 PM
Police, FCS&CA, H&FW, Horticultre, Agriculture, AH&V hotulu te leh AMC hotute nimin khan Chief Secretary Pu Lalnunmawia Chuaungo leh Additional Chief Secretary Pu JC Ramthanga hovin an thukhawm a, nitin mamawh phuhruk tura hmalakna hrang hrang an thlirho bakah, harsatna hrang hrang sutkian dan tur ruahmanna leh rawtna an sawiho.

Meeting-ah hian nitin mamawh sem darh chungchangte, Aizawl khawpui chhunga bawlhhlawh paih chungchangte, ran chaw leh damdawi dawr inhawn chungchangte leh an harsatna tawhte sawiho a ni a, Task Force leh sorkar department hrang hrangte thawhho dan tarlan a ni bawk

Meeting-ah hian Mizorama tangkhang mek, state pawn lam mite chungchang pawh sawi a ni a, sorkar laipuiin ruahmanna a lo siam tawh angin State Disaster Response Fund-a sum awmsa atangin an ei leh in tur buatsaih sak an ni ang. Mizoram pawn lama tangkhang mekte chunghang pawh meeting-ah hian sawi a ni a, Mizoram House-te leh Mizo Welfare Association hrang hrangte’n lo ngaihven tura ngen an nih tawh thu tarlan a ni.

Meeting-ah hian Police hotute chuan Mizo COVID-19 patient ruala thlawhnaa chuang ve mi 140 chhui zui an nih thu leh, patient nena intawk an awm leh awm loh (contact tracing) te pawh ngawrh taka an tih thu an sawi a ni.

2:51 PM
Cricket Association of Mizoram (CAM) chuan COVID-19 beihletnaa hman atan CM Relief Fund-ah cheng nuai 5 a pe

2:39 PM
Belgium-ah COVID-19 case thar 1702 chhinchhiah a ni a, mi 78 thi an awm belh bawk a, he rama case awm zawk zawng chu 10836 a ni a, thi zat chu 431 a ni

2:22 PM
Rajasthan-a cheng mi pakhat, tun thla ni 18-a Philippines atanga lo haw chu a positive tih hmuhchhuah a ni a, tun thla ni 26 (ningani kalta) khan natna lan chhuah dan hmuh tan a ni

2:21 PM
Ram pumah COVID-19 confirmed case 1046 a awm tawh a, heng zinga 933 chu enkawl mek an ni a, 86 enkawl dam an awm tawh a, thi zawng zawng hi 27 a tling tawh a ni

2:19 PM
Russia-ah confirmed case thar 270 a awm a, thi 4 an awm belh bawk, he rama case awm zawng zawng chu 1534 a tling tawh a, thi zat chu 8 a ni

2:08 PM
Lunglei DC-in thuchhuah a siam – Nitin mamawh phurtu lirthei khawiah mah dan emaw tihkhawtlai loh tur a ni a, a khalhtuten ei leh in leh thildangte ngaihtuah pui thin turin VLTF a ngen – Loneitute feh phalsak an ni a, a huova feh erawh phal a ni lo, an thlai thar khaw chhunga lakluh leh hralh chungchangah VLTF-te’n ruahmanna an siam ang – Mipui loh theih loha chhuah ngai (damdawi leh nitin mamawh lam tur) emaw, tul bik thila veivah ngaite’n VLTF phalna lehkha an nei ngei ngei tur a ni

1:47 PM
Railway hnathawk mi nuai 13-in an ni khat hlawh tlingkhawm, cheng nuai 151 PM-CARES Fund-ah an pe

1:46 PM
US: Houston-a Methodist Hospital-ah COVID-19 vei enkawl dam tawh thisena tui (plasma) chu damlo enkawl laiah pek a ni a, thisen inpeka he natna hrik thawh dan hi enchian zui tur a ni

1:10 PM
Canada PM Justin Trudeau-a nupui, Gregoire Trudeau chuan COVID-19 enkawlna hun eng emaw chen a dawn tawh hnuah, damah doctor-ten an puang tawh tih a sawi

12:54 PM
India company zinga coronavirus testing kit siam phalna nei hmasa ber chu Mylab Discovery an ni a, an testing kit hi cheng 1200 a ni a, hei hi India-in ram pawn lam atanga a lakluh man hmun li-a thena hmun khat vel a ni a, a siamchhuaktu team hotunu Minal Dkhave Bhosale hian nau pai chungin rim takin hna a thawk a, testing kit an siam zawh tukah hian fanu a hring nghe nghe a ni

12:45 PM
PM Narendra Modi chuan vawiin khan Mann ki Baat radio programme a hmang leh a, tun dinhmunah chuan inkhunghran a pawimawh thu leh phawklek loh a pawimawh thu a sawi a, thenawm leh thiante nen rilru inhnaih tak siin, awm hmun erawh tih hlat a tul thu a sawi a, ina inkhunghrang tura tihte enhrang emaw, thinhrik lo turin mipuite a chah bawk

12:16 PM
Maharashtra-a khawpui pakhat Ahmednagar-a COVID-19 postive patient hmasa ber chu enkawl dam a ni a, a test pawh a negative tawh avangin in lamah ni 14 la inkhunghrang leh turin damdawiin aṭangin chhuah tir a ni

12:08 PM
Kerala-a Indian Union Muslim League hruaitu hmeichhe pakhat chu inneih a huaihawt avangin sorkar thupek bawhchhiaah puh a ni a, thubuai siam sak a ni, a rual hian ina inkhunghrang tura tih mek a fapa pawh thubuai siam sak a ni ve bawk

12:05 PM
Health Minister leh Aizawl DC-in midang nen inhlat taka awm turin mipui an ngen a, hmun khata awmho pawhin inhlat deuh taka awm turin mipuite an chah

12:05 PM
Rural Development Department chuan MGNREGS hnuaia ni 100 inhlawh dan tur ruahmanna a siam a, April atanga hman tan turin ni khat hlawh pawh cheng 211 aṭangin cheng 225-ah tihsan a ni

12:05 PM
PM Kissan hnuaia loneitute hnena hamṭhatna pek tura Union Finance Ministry-in a lo ruahman tawh chu nimin khan tih fel a ni a, Mizorama loneitu chhungkua 16350 hnenah cheng 2000 ṭheuh pek a ni

12:01 PM
Central Board of School Education (CBSE)-in PM-CARES Fund-ah cheng 21,00,000 he pawisa hi CBSE hnathawkte thawhkhawm a ni a, Group-A hnathawkten ni hnih hlawh an thawh a, Group B leh Group C hnathawkten an ni khat hlawh an thawh ve bawk a ni