Meghalaya leh Nagaland Assembly inthlan neih a ni

0
390
views

Meghalaya leh Nagaland-ah te vawiin khan Assembly inthlan neih a ni.

Nagaland-a inthlan-ah hian polling station 2,156 siam a ni a, heng zinga 1,100 chu dinhmun hlauhthawnawma dinga puan a nih bakah, polling station 530 chu buaina chhuah theihna hmunah puan a ni bawk a, State Chief Electoral Officer, Abhijit Sinha chuan heng hmun-te venghim tur hian state police-te bakah CAPF company 281 lai tirhchhuah an ni a ti a, zing lamah khan Mon District-a Tizit polling station-ah bomb tihpuah a nih vangin mi pakhat a hliam tih loh chu boruak han sosang em em a awm lo niin a sawi bawk a ni. Nagaland-ah hian vote nei mi 11,76,432 an awm a, Northern Angami-II bial chuhtu, Neiphu Rio chu chuhtu awm lova tlinga puan a lo nih tawh avangin, bial 59 atan inthlan hi buatsaih a ni a, polling station tam zawkah chuan tlai dar li thleng vote thlak theih a ni ang a, dinhmun hlauhthawnawma dinna-a puan district-ah te chuan tlai dar thum thleng vote thlak theih a ni thung ang.

Meghalaya-ah pawh tukin dar 7 atang khan vote thlak tan a ni a, Williamnagar bial tih loh, bial dang 59-a inthlanna atan, polling station 3000 siam a ni a, heng zinga 340 chu dinhmun hlauhthawnawma puan a nih bakah, 580 dang chu buaina chhuah theihna hmuna puan a ni tih State DGP SB Singh chuan a sawi a ni. Tun tum Meghalaya inthlan-ah hian hmeichhia chauhin vote an thlak theihna polling station 67 siam a ni a, candidate 361 zingah hmeichhia 31 an awm bawk a ni.

Puan tawh angin state pahnih inthlana vote tla-te hi Tripura nen a rualin, thla thar ni 3-ah hian chhiar tur a ni.