Middle East buaina chungchang US President Donald Trump a sawipui tih Russia President, Vladimir Putin-a’n Mahmud Abbas hrilh

Russia President Vladmir Putin chuan Middle East buaina chungchang chu US President Donald Trump a sawipui tih Palestine hruaitu Mahmud Abbas a hrilh. Vladmir Putin leh Mahmud Abbas te hi nimin khan Moscow ah an inkawm a, an inkawm tan dawn hian Putin hian US President Donald Trump chu a biak thu leh Irael leh Palentine buaina chungchang pawh a sawipui ngei thu a hrilh a ni. US President Donald Trump-an Jerusalem chu Israel khawpui ah a pawm thu a puan hnuah Mahmud Abbas hian Russia nena an inlaichinna tih ngheh tumin Moscow hi a tlawh a, Putin chuan thil awm dan chu tha lo a tih thu sawiin, Russia chu Palestine mipuite lamah a tang reng a ni a ti. Nikum kum tawp lama US President in Jerusalem chungchang a sawi hnuah Mahmud Abbas hian Washington nena inbiak pawh a duh ta rih lo bawk.