Mihringte sualna tlan tura Isua Krista khenbeh a nih champha, Good Friday chu naktukah hman a ni dawn.

0
955
views

Mizorama Kohhran hrang hrangte chuan zaninah lungngaih zan, Maundy Thursday an hmang \an a, Presbyterian Kohhran chuan zanin hian Synod-in thupui a thlansa ‘Mi venpui rawh u’ tih hmangin Pathian thuchah an ngaithla ang a, Lalpa Zanriah Sacrament an kilho bawk ang. Good Friday chawhma inkhawmah ‘Isua an hnawl’ tih thupui ngaithlak a ni ang a, chawhnu Inkhawmah ‘Ka pa, anni hi ngaidam rawh’ tih leh zan inkhawmah ‘Kraws – Inremna’ tih thupui hmangin Pathian thuchah ngaithlak leh a ni ang.

Mizoram Baptist Kohhran pawhin Lalpa Zanriah Sacrament kilin headquarters a\anga thupui thlan sa, “Ka hnenah Paradis-ah i awm ve ang’ tih hmangin Pathian thuchah an ngaithla ang a, Good Friday leh Easter Sunday programme-ah hian BCM hruaitute chu Kohhran hrang hrang programme hmanpuiin an fehchhuak a ni.

Salvation Army chuan zanin hian lunngaih zan inkhawm an nei a, Good Friday chu Corps hrang hrangin an remchan danin an hmang dawn a, Corps \henkhat chu ruai nena hmang tur pawh an awm a ni. Territorial Commander, Commissioner, Lalzamlova chuan Good Friday chu Thingsulthliah Corp-ah a hmang dawn a ni.

Mizoram UPC pawhin zanin lungngaih zanah Lalpa Zanriah Sacrament an kilho ang a, naktuk, Good Friday chu Kohhran hrang hrangten an remchan dan angin an hmang ang a, ruai nena hmang tur te pawh an awm bawk a ni.

Catholic Kohhran chuan Lal Isua tuarna \awmpuina lantir nan Kohhran hrang hrangin Kross kawngzawh an nei leh anga, Biak in an thlen hnuah Kross chawimawina neiin, Eukaris ruai an \heh dawn a ni.