Minister hlui, Pu F Lawmkima in lei tawlh vangin chim

0
558
views

Tukin dar 6 vel khan Minister hlui, Pu F Lawmkima in, Kulikawna Assam Type, chhawng 2 chu a dinna lei a tawlh avangin a chim a, vanneihthlak takin a chim hma hian a chhunga awmte an tlan chhuah hman avangin thi leh hliam an awm lo a ni. Kulikawn khawtlang hruaitute hnen atanga ZONET thu dawn danin, he vanduaina thlen lai hian in luahtute hi an la mu a, chhak lama step min tur lung lum hmasa-in In hi a deng hmasa a, a thawmah in chhunga awmte chu harhin, rang takin an tlan chhuak a, step hi a min zui a, a hnu lawkah in dinna lei chu a tawlh avangin in hi a chim ta a ni. In chim hian a luahtute bungrua a chimpui vek avangin an thawmhnaw hak lai bak engmah an chuh hman lova, in chim hi a sawp hneh hle a, step erawh chu chhe vek lovin a tawlh a, a thlanga thing dingin a dan avangin vanduaina lian zawk a thleng lo nia thu dawn a ni. In chhawng chung zawk hi zirlai unauin an luah a, a hnuai hi Pu Muanpuia’n a luah a ni. Vanduaina thlen veleh hian Kulikawn khawtlang chu inau khawmin, a hmunah an tlan khawm a, he thil thlenna hmun hi silpauline-a khuh nghalin bungraw senghawi theih ang ang an senghawi bawk a, vawiin khan nilengin an hnatlang chhunzawm a, In chimin bungrua a chimpui, lak khawm theih ang ang la khawmin buaipui ngai apiang an buaipui nghal a ni. He vanduaina thlenna hmun hi bialtu MLA, Lt. Col. ZS Zuala leh AMC Ward Councillor, Pu Lalthansanga’n an tlawh nghal a, tanpuina an pe bawk.