Miss Mizoram 2018 Grand Finale neih a ni dawn

0
700
views

ZONET leh MJA buatsaih Miss Mizoram Contest 2018 Grand Finale chu zanin hian Mualpuia R. Dengthuama Hall-ah neih a ni dawn. Zanin hian nula nalh leh hmeltha thlan chhuah 12 an inlan dawn a, an zingah hian Miss Mizoram 2018 thlan chhuah a ni ang a, hemi rual hian Miss Congenielity, Miss Personality, Miss Multimedia, Miss Rampwalk, Beauty with a purpose leh Best Gown te thlan tel a ni bawk ang. Hemi hmalam, February ni 27 khan Chanmari YMA Hall-a The Closet Show neihah heng nula nalh leh hmeltha zingah Miss Photogenic, Miss Perfect 10, Miss Active leh Miss Talented te puan a lo ni tawh a, Miss Photogenic Sub Title hi Laldintluangi hlan a ni a, midangte chu Miss Perferct 10 leh Miss Talented Title chu C. Lallawmzuali’n a la a, Miss Active chu Lalnunnemi hlan a ni. Zanina Finalist te hi C Lallawmzuali, Chatuanmalsawmsangi, Emalie B Lalchhanchhuahi, Laldintluangi, Lalnunnemi, Lalphirthangi, Lalremruatpuii, Malsawmtluangi, Josephine Lalnunfeli, KC Lalhmunsiami, Lily Lalremkimi leh T. Ramthanmawii te an ni a, he Grand Finale-ah hian Miss Mizoram thlan tan tirh kum 1983 atanga Miss Mizoram leh Miss Mizo lo ni tawh mi 13-te pawh chawimawi an ni dawn a, programme kar lakah hian zaithiamte an zai bawk ang. Miss Mizoram 2018 hian lawmmanah Rs. 1,10,000/-, Dubai Trip, Vespa Scooter, Vivo Smartphone a dawng ang a, Magnus Health Club Gym free membership pek a ni bawk ang. He Programme tanna Red Carpet chu zanin dar 7 atangin ZONET Bawhbel Channel-ah live-a pek chhuah a ni ang a, Miss Mizoram Grand Finale chu zanin dar 8 atangin ZONET Zawlbuk Channel, ZONET HD leh ZONET Youtube Channel-ah live-a pek chhuah a ni ang.