Mizo Hmeichhe Insuihkhawm Pawl MHIP General Headquarters hruaitu tur vawiin a thlan tura tih chu Court-in inthlanna buatsaih lo tura a tih avangin an inthlang thei lo.

0
1295
views

MHIP General Assembly hi nimin khan \an a ni a, ruahman lawk ang chuan vawiinah chhunzawma kum 2019-2021 chhunga an pawl hruaitu tur thlang tur an ni a, inthlanna buatsaih dan turah thil dik lo awm nia hriain Pi Rohmingliani Aizawl Kulikawn veng chu Court-ah a zualko a, Court-in a ngaihtuah hnuah MHIP te chu inthlang rih lo turin nimin khan a hriatitir a ni.

Thubuai thehluttu Pi Rohmingliani Ukil Pu K Remruatfela chuan MHIP Gen. Hqrs. office bearers tur thlan turah MHIP Gen.Hqrs. hruaitute a\angin thil dik tawk lo tih a awm tih hriat a nih avangin Court-ah thubuai hi an thehlut tih a sawi a, Court hian thil fel lo leh ballot paper tihchingpen a awm nia sawi chu thu tling-ah ngaiin hruaitu thlanna neih tur chu kaltlangpui lo turin nimin khan thupek a chhuah a ni a ti.

Hetihlai hian MHIP Gen. Hqrs. President Pi Saipuii chuan, Court-in inthlang thei lo tura a hriattir chu pawi a tih thu sawiin inpuhchhiatna a ni a ti thung a, inthlang tura lam hla tak a\anga an member lo kal te lung hnur taka an haw a ngai chu pawi a tih thu a sawi.

Pi Saipuii chuan ni danga an tih \hin angin NGO a an thawhpui zinga mi pawl dangte chu inthlanpui turin an sawm \hin tih a sawi a, tun \umah inthlanpui tur hian MSU te an sawm a, inthlan chuh thei tur secret ballot-a mi 10 an thlan chhuah lawknaah vote thlakna bawm chu tun thla ni 13 khan MSU te hian MHIP pisaah inkal hnanin an hawng tih a sawi a, darkar 4 vel hun an hman hnuah pawh an zawh theih loh avangin amah pawhin thil awmzia a zawt tih a sawi.

MSU President Pu Vanlaliana Khiangte chuan, ballot paper \henkhat chu thu inang, khawla chhut vek a nih avanga a pawm theih loh thu sawiin a hnawl tih Pi Saipuii chuan a sawi a, chumi hnua hruaitu atana thlan theih tur hming lo lang ta zingah OB \anglai 4, Executive \anglai 1 bakah midang 5 te an tel tih a sawi a, ballot paper hi tun thlengin amah pawhin a la hmu ve lo niin a sawi.

Hetiang hi thil awmdan a nih laiin Social media lamah thil dik lo a awm nia tarlan a awm ta tih Pi Saipuii chuan a sawi a, inthlanpui tura MSU an lo ruat tawh chu MHIP executive Committee-in a rel angin, MUP te sawm an ni ta zawk a, MSU hian MUP te chu inthlanpui lo tura lehkha an pek avangin MUP te pawhin an sawmna an lo hnawl ta tih a sawi.

Pi Saipuii chuan Court thutlukna an hmuh hnuah hian Co Ordiantion Committee hmanhmawh an ko nghal tih a sawi a, thil awm dan an inhrilhfiah tih a sawi. Zawhna chhangin Pi Saipuii chuan an pawl Legal Adviser te thurawn angin hma an lak chhunzawm zel tur thu a sawi.