Mizo hnama chianna in ramri a kan a ngai tih Home Minister Pu R Lalzirliana’n a sawi. He thu hi vawiina Zofa Global Convention Aizawl Chanmari YMA Hall-a neih a hmanpuinaah a sawi a. Pu R Lalzirliana chuan, zofate chu ram inrelbawlna avangin hmun hrang hrangah thendarhin kan awm a, tawng leh khawsak phung inan loh avangin inkungkaihna pawhin a tuar a ni a ti a, thangthar teah unau nihna man thiam lo an awm a hlauhthawn thu a sawi a, inngaihdam tawnna atangin inunauna tha zawk siam theih a nih a beisei thu a sawi. Pu R Lalzirliana chuan, Mizoram chu Zofate inpui ni tura inbuatsaih a nih laiin a chhunga chengte pawhin rilru inhawng taka inpumkhatna leh inunauna tinghet zel tura tan lak a tul tih a sawi. Zofa Global Network Chairman Pu Sangzela Tlau pawhin thusawiin Mizoram chhung leh pawna zofate zawng zawng chu unau nihna sawhnghet tura mahni hmazawn theuha tan la turin mipui te chah. Zofa Global Network hi kum 2013 July ni 2 khan din a ni a, khawvel hmun hrang hranga Zofate insuihkhawmna tur leh intanpui tawn tura pawl ding a ni.
