Vawiina Aizawl Press Club-a thuthar thehdarhtute an kawmnaah an pawl President, Pu Lalneihkima chuan Mizote chu hnam thatchhia an ni lo nia sawiin, kuthnathawktuten an thawhrim ang hu hlawkna vawiin thlenga an la tel theih loh chhan chu sorkar awm tawhten mipui dinchhuah an duh tak tak loh vang niin a sawi a. An pawl chuan intodelh tura hma an laknaah Company pakhat nen Starbean lei tur hian a thuphunga inremna an siam tawh thu sawiin, Mizoramah a chingtu an la tam tawk loh avanga MOU an la ziahpui ngam rih loh thu an sawi a. Mizoram khawi hmunah pawh hetiang thlai hi chin theih a nih thu sawiin, Acre 1-ah kung 500-600 vel chin theih a ni a, a rah hi an pawl chuan Kg khat cheng 200 zela a leisak tur thu leh tunah pawh hian an lei theih reng thu a sawi. Mizo Traditional Herbal Medicine Society hotute chuan, he thlai ching duhtute chu kung khat cheng 100 zela an chahsak theih thu leh a \ul a piang an ngaihtuahpui theih thu an sawi a, vawi khat phun nun tawh chu kum 30-50 thleng a dam theih avangin eizawnna tling a ni tih an sawi. Zawhna chhangin an pawl hotute chuan, he thlai ching uar tura an duhna chungchang hi kum 2011 a\ang daih tawh khan Horticulture Department hotute an lo sawipui \hin tawh thu leh vawiin thlenga a hlawhtlinna an la hmuh rih loh thu an sawi a ni.
