Mizoram Baptist Kohhran Assembly vawi 123-na Lunglei Venglai BCM Kohhran Biak Ina rorel inkhawm vawiina chhunzawmah Serkawna Nursing School chu Nursing College-a hlankai remtih a ni a, Odisha State-ah Mission Field thar hawn remtih a ni bawk.

0
857
views

BCM President, Rev. PC Liandula kaihhruaia rorelah hian BCM Kohhran hnuaia Kristian Naupang Pawl (KNP) te zinga rawngbawlna tun aia changtlung zawka siam nise tih chu pawm a ni a, hemi hmalam hian Kristian te hunpui, Krismas leh Good Friday bawhbuai zawnga programme siam lo tura sorkar laipui ngen ni rawh se tih chu pass a lo ni tawh a ni. BCM Assembly hian Executive Committee-in BCM hruaitu thar atana a ruatte a pawmfel tawh a, chungte chu General Secretary atan Rev. F. Ramdinmawia, Associate General Secy. Mission enkawltu atan Rev. Dr. C. Vanlaldika, Associate General Secretary Service enkawltu atan, Rev. R. Lalbiakliana, Aizawl Area-a Executive Secretary atan Rev. Dr. R. Lalthanmawia, Executive Secretary, Lawngtlai Area atan Rev. R. Lalnunzira, Academy of Integrated Christian Study Principal atan Rev. Dr. Vanlalchhawna Khiangte, Medical Superintendent atan, Dr. Lalramzauva, Hatim Principal atan Pu Vuansanga, BHSS Principal atan Pu R. Zosangliana leh School of Nursing Principal atan Pi Vanlalthlengliani te an ni. He Assembly-ah hian naktuk chawhma inkhawmah BCM President, Rev. PC Liandula’n Pro Pastor 8 Pastor puitlingah a nemnghet ang a, Pro Pastor 8 a lalut bawk ang. BCM Assembly-ah hian Pastor bial 88 a\angin rorel palai 1,085 an tel a, zanin Pathian biak inkhawmah Rev VL Zarzoliana’n thupui atana thlanchhuah ‘Isuan ro a rel-hmelmate leh lei lalte chungah’ tih hmangin Pathian thuchah a sawi ang.