Mizoram Chakma Students Union-in Technical Course hrang hrang zir tur thlanna dan Mizoramin a hmanlai, The Mizoram (Selection of Candidate for Higher Technical Courses) Rules, 2016 an khinna chu Gauhati High Court in October ni 4-a ngaihtuah leh turin a ti a, hemi rual hian he dan hmang rih lo tura Mizoram sorkar a hriattirna chu a hlip thung.

0
481
views

Chakma zirlaiten Writ petition hmanga he dan an khinna hi Gauhati High Court chuan June ni 24 2016 khan a pawm a, rule no 5 chu hmang rih lo turin Mizoram sorkar a hriattir nghal a, he thu hi Aizawl Bench a ngaihtuah turin 2017 April thlaah thawn a ni a, \um engemawzat ngaihtuah tura chhawpchhuah anih hnuah a khingtu lam an inlan loh avangin Division bench chuan kumin may ni 2 khan PIL hi a titawp a ni.

Hemi bawhzui hian Mizoram sorkar chuan Technical zir tur thlanna kalpuiin seat awm zinga zaa 75 a hnawhkhat hman tihah he dan khingtu Chakma zirlaite chuan Writ Petition an lo thehluh tawh chu ti nung leh tura ngenna kumin June ni 11 khan an thehlut leh a, hei hi August ni 18 ah Court chuan phalsakin, kum 2016 june ni 24-a rule no. 5 hmang rih lo tura hriattirna a lo siam tawh pawh chu a tih nun leh nghal a ni.

He thubuai nimina ngaihtuahtu Gauhati High Court Chief Justice Ajit Singh leh Justice Manoji Bhuyan te chuan a khingtu lamin Petiton tih nun leh an dilnaah Mizoram sorkarin seat zaa 75 a hnawhkhat fel tawh tih an tarlan loh vang leh thubuai inchiah vang hian seat awl la awm te chu hloh a nih dawn avangin Mizoram sorkar chu admisssion kaltlangpui anphalsak a, thubuai chu October ni 4 ah ngaihtuah leh turin a dah ta a ni.

Nimina Sorkar aiawha High Court-a ding Ukil Pu JC Lalnunsanga chuan thil awmdan hetiang hian ZONET a hrilh.