Mizoram Cultivator and Labour Union (MICLUN) President, Pu KC Lalliana chuan Sorkar laipui puihnaa mi harsa zawkte tana chenna in sak chu Mizo dik tak chauh luahtir ni se an duh thu sawi

0
970
views

Mizoram Cultivator and Labour Union (MICLUN) President, Pu KC Lalliana chuan Sorkar laipui puihnaa mi harsa zawkte tana chenna in sak chu Mizo dik tak chauh luahtir ni se an duh thu a sawi a. He thu hi vawiina Aizawl Press Club-a thuthar lakhawmtute a kawmnaah sawiin, Basic Service to Urban Poor (BSUP) hmanga Lawipu, Rangvamual leh Durtlanga in sak mek luah diltu zingah Mizo ni lo an awm nual nia an hriat thu leh Sorkar-in inkaihhruaina dan a siamah India khua leh tui dik tak, Aizawla kum 5 tal cheng tawh leh in leh lo nei lo an ni tur a ni tih chauh a nih avangin Mizo ni lo tan pawh dil theih a ni a, hetianga Mizo ni lo luah tir an nih chuan nakin zelah harsatna a thlen thei dawn nia sawiin a luah tur thlan kawngah Sorkar fimkhur se an duh thu a sawi a ni. Zawhna chhangin Pu KC Lalliana chuan Lawipu-a Sorkar-in chenna in a sak chu chhungkaw 40 chuangin an luah tawh thu leh tuna luahtute chu Mizo vek nia an hriat thu a sawi a, Lawipu-a chenna in sak bula Quarry-ah vawiin thlenga lung lak ala nih avangin a chengten harsatna an tawh mek thu leh thuneituten enfiah sak se a duh thu pawh a sawi. MICLUN President chuan, Aizawl Municipal Corporation (AMC) kaltlanga Aizawl khawpui chhung tihhmasawnna tur sum tam tak lo kal chu a hmanna tur dik taka hman ni lova an hriat avangin kum 2011-15 chhunga sum hman dan kimchang chu kum 2015 October thla khan RTI hmanga an dil thu leh a chhanna an hmuh loh avangin hemi kum vek hian an dil nawn leh a, a chhanna an dawnah chuan thil fel tawk lo awm nia hriat a nih thu leh a chhui chiangtu tur, Fact Finding Team din a nih thu tarlan a ni a. Hemi chungchang bawk hi kum 2016, May ni 2 khan RTI hmangin dil nawn leh mah se, vawiin thlengin a chhanna an la hmu ta lo niin a sawi a, Pu KC Lalliana chuan, heng thil dik lo hrang hrang nia lang hi chinfel a nih thuai loh chuan FIR thehluh thlenga bawhzui an tum thu a sawi a. Aizawl khawpui chhunga Parking Fee lak dan mumal lo lutuk pawh thuneitute a rang lamin enfiah se an duh thu pawh a sawi bawk.