MNF in Zalenna a puan champha Mizo National Day chu vawiin khan Mizoram hmun hrang hrangah MNF Party ten an hmang. Aizawlah chuan Mizo Hnam Runah hman a ni a, Party Sr. Vice President Pu Tawnluia chuan, MNF in zalenna a sual chhan chu Mizo hnam a dinchhuah nan leh Kristian sakhua humhalh a nih theih nan a ni a ti a, Mizo ten an chanvo dik tak an chan theih nan Pu Laldenga hova MNF ten zalenna an sual chu an tih tur dik tak a ni a ti. Pu Tawnluia chuan, Zofa te rorelna pakhat hnuaia an awm theihna atana hma la turin MNF chu din a nih thu a sawi a, zalenna sual avanga nunna chan ta te chawimawi chu Zofa te tih tur a nih thu sawiin englaipawha hnam thinlung put chu thil tih makmawh a ni a ti. Pu Tawnluia chuan, Congress sorkarah Mizo hnam chu kutdawh hnamah a chhuak mek niin a sawi a, dan leh hrai bawhchhiatna a tam bakah Sum pelhe a tam hle nia sawiin eng hmasawnna mah an thlen dawn lo niin a sawi. Pu Tawnluia chuan, MNF SEDP chu vote zawnna ni lovin mipuite dinchhuah na tur leh intodelhna tura buatsaih niin a sawi a, an party chu sorkar turin a inbuatsaih mek nia sawiin mipui sorkar, eirukna laka fihlim an din dawn niin a sawi. Inkhawm hi an pawl Vice President Pu R Tlanghmingthanga’n a kaihruai a, MNF in zalenna a sual laia thite sunna hun an hmang bawk.
