Mizoram Institute of Medical Education & Research-ah nimin khan Intensive Care Unit, Blood Bank, Oxygen Generating Plant leh Bio-medical Waste Incinerator Plant thar Health Minister, Pu Lal Thanzara’n a hawng.

0
258
views

 

Hawnna inkhawma thusawiin Minister chuan he damdawi ina Doctor zirna tichangtlung tura hmalakna a hlawhtling zel niin a sawi a, MIMER hnuaia State Referral Hospital-a ICU-a khum indaihlohna avangin khum 20 dang awm theihna siam belh tum niin a sawi a, CT Scan leh MRI bun mek niin a sawi bawk. Health Minister hian damdawi ina awm mi retheite \anpuina tur Poor Fund-ah cheng nuai khat a pe bawk.

He inkhawma khualzahawm Agriculture Minister, Pu KS Thanga chuan he damdawi in a\anga damdawi in bawlhhlawh chi hrang hrang sawngbawlna tur khawl thar bun a ni chu damdawi in awmna hmuna awmte thlamuang taka awm theihna tur niin a sawi a ni.

Intencive Care Unit hawn takah hian khum 20 a awma, Medical Council of India duhdan angin General ICU-ah khum 10, Neonatal ICU-ah khum 5, Surgical ICU-ah khum 5 dah a ni bawk a, heng atan hian cheng vbc 2 leh nuai 90 sen a ni.
Blood Bank-a thisen sawngbawlna khawl hrang hrangte hi cheng vbc 3 leh nuai 60 senga dah a ni a, Oxygen Generating Plant atan hian cheng vbc 1 leh nuai 90 hman a ni a, bawlhhlawh sawngbawlna, Bio Medical Waste Incinerator Plant atan cheng nuai 300 sen a ni a, hei hian darkar khatah bawlhhlawh Kg 100-a rit a hal ral thei a ni.