Mizoram leh Assam Ramri chingfel turin Congress leh MNF in tih theih an nei tawh lo nia sawiin, BJP a sorkar a ngai niin BJP State President Prof JV Hluna’n a sawi. Vawiina an party office Aizawl-a chanchinbumite a kawmnaah Prof JV Hluna chuan MNF leh Congress sorkar lo ding tawhte chu ramri chungchanga ngaihtuahna tak tak la seng ngai lovah a puh a, hei hi zirlai pawl ten nasa takin an tawrh phah a ni a ti. Zawhna chhangin Prof JV Hluan chuan kum 1875 a Suakpuilala te rem tihnaa ramri kham kha Mizoram State BJP chuan Mizoram chinah an pawm tih a sawi a. India leh Mizoramin Inremna an siam lai khan ramri in ngaih pawimawh a hlawh zo lo niin a sawi bawk. Prof JV Hluna chuan tunah hian India Hmarchhak-ah Mizoram tih loh State dang zawngah BJP telna ten sorkar an siam tawh tih a sawi a, Mizoramah sorkarna siam tura hma an lakna ah pawisa sem an tum lo tih a sawi bawk.
