Mizoram Lok Sabha inthlanna-a vote thlak zawh takah candidate te hming tarlan indawt dan dik loh vangin Congress party leh ZPM \angdunin inthlan buaipuitute lakah FIR an thehlut.

0
263
views

Congress party leh ZPM \angdun aiawhin MPCC Legal Dept. Secretary Pu James Thanghmingmawia’n Lunglei Police Station ah FIR hi vawiin khan a thehlut a, Congress leh ZPM thlawp candidate Pu Lalnghinglova Hmar chu candidate te hming ziah tlarnaah 5-na anih laiin Lunglei Dist. khaw hrang hrang Polling station-a tarchhuah-ah sl. no 4 ah dah a ni tih FIR a thehluhah chuan sawiin, hemi avang hian vote thlaktu tam tak, abikin mizo\awng chhiar thiam lo te zingah an tum loh zawk candidate vote an awm phah niin a sawi a, Pu Lalnghinglova Hmar vote tum te, an tum loh zawk vote tir tuma hre reng chunga thil tih nia sawiin a mawhphurtu Returning Officer Aizawl DC leh Asst Returning Officer Lunglei DC te chunga dan anga hma la turin Police te a ngen a ni.

Hemi hnu hian MPCC Gen Secretary Pu Joseph Lalhimpuia MLA hlui chuan Lunglei press club-ah chanchinbumite kawm zuiin candidate te hming ziak dik lo a awm tih hriat anih veleh Chief Electoral Officer ah complaint an thehlut tih a sawi a, vawiin thlenga hmalakna hriat tur a awm loh avangin Police te hi hmala turin an pun ta niin a sawi a, an complaint thehluhin ngaihsak a hlawh loh lai hian Vanglaini chanchinbu-a party symbol ziah sual erawh thu taka la in bawhzui nghal a ni si niin Pu Joseph Lalhimpuia hian a sawi bawk.