Mizoram Police chuan dinchampha vawi 46 na vawiin khan Mizoram pumah an lawm. Aizawlah chuan Khatlaa Police Headquarters Arya Mess-ah lawm a ni a, inkhawm hi IGP (Intelligence) Pu Neeraj Thakura’n a kaihruai a, IPS chawl tawh Pu F Lalremsiama chuan hmanpuiin he ni puala Souvenir a tlangzarh a,Police Service Medal, Police Station tha ber lawmman leh DGP Commendation Disc te semchhuah a ni. Kum 1972 Januaray ni 21 a Mizoram Union Territory puan a nih khan Mizo District-a Assam Police ni thin chu Mizoram Police tih a ni nghal a, Mizoram IGP hmasaber atan Pu J.J Verma ruat a ni a, he ni hi Mizoram Police dinchampha atan pawm a ni. Mizoram Police Rising day ni tak hi nimin kha a ni a, Pathianni a nih avangin vawiin khan lawm a ni ta zawk a ni.
Tun dinhmunah Mizoram Police-ah hian Police Sub-Division 17, Police Station 38 leh Police Outpost 14 a awm a, Police 8897 an awm mek a ni. Armed Battalion 3 leh India Reserve Battalion 5 an awm bawk a, Armed Battalion ah hian sipai 5475 an awm a ni. Mizoram police din atanga tun hun thlengin ram tana nunna hlan police 56 an awm a, chawimawina dawng thahnem tak an awm tawh bawk.
Lawngtlaiah chuan Mizoram Police din champha hi SP Conference Hall-ah hman a ni a, Additional SP, Pu VL Lura Hauzel kaihhruaia hman a ni a, fuihna thusawiin Additional SP chuan Police te chu hun hmang dik tur te, duty laia inthlahdah lo tur leh zu in lo tur te, aia senior zawkte thu ngaichang thin tur te-in a fuih a ni. He inkhawma thusawitu SDPO, Pu Victor Zothansanga chuan Police te chu inthununna tha tak nei turin a chah a ni. He inkhawmah hian Mizorama Police Station tha thlanna neiha Lawngtlai Police Station chu a tha thlan chhuah 3 zinga a lang phak chu thil lawmawm leh an vaia thawhrah niin a sawi a ni.
Serchhipah pawh Police din champha hi SP Conference Hall-ah Additional SP, Pu Lalmuanpuia kaihhruaia hman a ni a, hetah hian District SP, Pu Lalringdika chuan fuihna thusawiin Police-te chu mipuite thlamuantu leh tanpuitu an ni tih sawiin, an hnaa inpe zo taka thawk turin a chah a ni. He inkhawmah hian Mizoram Police Rising Day Celebration Committee atanga thuchah chhiarchhuah a ni bawk.
