Mizoram Pradesh BJP ten Pandit Deendayal Upadhaya Vistarak Yojana hmang

0
299
views

Mizoram Pradesh BJP chuan an party National Joint General Secretary, Pu Shiv Prakash hovin nimin leh vawiin khan Aizawla BJP Office-ah Pandit Deendayal Upadhaya Vistarak Yojana an hmang a, Pu Shiv Prakash chuan nakkuma Mizoram Assembly inthlanna turah BJP-in thuneihna a chan theih nana nasa taka tan la turin an party mite a fuih a, Pandit Deendayal Upadhaya Vistarak Yojana-in a tum ber chu District tina Full Time Worker, Vistarak-te enkawlna hnuaia Booth Level Committee dina chak taka hnathawhtir niin a sawi. Booth Level Committee-in Polling Station tin huam chhungah vote nei zawng zawngte tlawh chhuakin an party candidate vote turin an ngen dawn niin a sawi a, an hnathawh dan chu District Level-a Vistarak-ten an vil reng dawn niin a sawi bawk. Pu Shiv Prakash chuan PM, Pu Narendra Modi-a kaihhruaina hnuaiah sorkar laipuiin mipui thleng phak hmasawnna scheme 105 a siam niin a sawi a, chung zingah chuan sum sengso lova ram khua leh tuite tana bank account hawn theihna, tuna mi vbc. 29-in an hman tangkai tawh te, eirukna tibo tura tan lakna te, mi harsa zawkten dah kham ngai lova bank atanga cheng nuai 10 thleng an puk theihna, Mudra loan scheme te, thalai lehkhathiamten anmahnia eizawnna hna an insiamsak theihna tura Stand up India scheme duan tharte a tel niin a sawi a, heng mipuite hmasawnna tur scheme hrang hrangte hi hmang duh lohah Mizoram sorkar chu a puh a ni. He inkhawmah hian an Party State General Secretary, Pu Vanlalhmuaka pawhin thu a sawi a, Citizenship (Amendment) Bill, 2016 duh lohna, sorkar laipui hnena thawn har lutukah Mizoram sorkar chu puhin, hemi avang hian tlawmngai pawl hrang hrangte leh Political Party hrang hrangte anmahni ruahman anga inhmuh khawm a ngai ta hial niin a sawi a ni.