Mizoram Pradesh Congress Committee chuan NLUP dawng tur thlan danah thil dik lo leh thlanna danah inkaihhruaina mumal a awm lo nia sawia Gauhati High Court-a Mizoram sorkar hek tute thil tih avanga NLUP tanpuina sem tihkhawtlai a ni chu chu pawi an tih thu an sawi.

0
503
views

Hemi chungchanga vawiina thuchhuah an siamah MPCC chuan he hekna chungchang hi Pu Lal Thanhawla kaihhruai Congress sorkar tihmualpho tumna niin an sawi a, NLUP dawng thei tur thlan chungchang hi a tira NLUP kalpui dan tur duan a nih khan duan tel vek a ni a. Hei hi NLUP Manual tia vuah niin internet-ah pawh hmuh mai tur a awm reng tih sawiin, hetianga guidelines awm reng chung si a sorkar hek tuin guidelines awm lo ang leh NLUP \anpuina sem chungchangah thil langtlang lo a awm nia Gauhati High Court a hrilh hi a vanduaithlak hle niin an sawi. MPCC chuan, NLUP dawng thei tur hi guidelines a ziah angin Central YMA bultumin khua leh veng tina chhungkua zawng zawng zirchian a lo ni tawh niin an sawi a. Rokhawlhna engemaw avanga CYMA a tel leh tak loh hnu khan Mizoram University chuan NLUP dawng thei tur endikna hi a kalpui ve leh a, chung chhungkaw hming list chu NLUP Implementing Board Office-a thehluh vek a ni tih an sawi a ni.

MPCC chuan mi retheite dinchhuah vena tur NLUP \anpuina hi eptu pawlten an haw em em tih chu Central sorkar leh Court-a an khinna a\angin a lang chiang hle niin an sawi a, heti chung hian NLUP chu Pathian lam\ang programme a nih avangin heknate chuan awmzia a nei ngai lo a, tuna hekna pawh hi inkaihhruaina mumal a awm reng laia inkaihhruaina awm lo anga sawi a nih avangin High Court-a thubuai awm anga lang hi awlsam taka chinfel tur nia sawiin he programme hi tihtawp a ni dawn lo niin an sawi a ni.

Puan tawh angin Human Rights & Law Network President, Pi Vanramchhuangi chuan Mizoram sorkar-in NLUP hnuaia \anpuina sem danah thil dik lo leh thil lang tlang lo a awm nia sawiin, Gauhati High Court-ah PIL a thehlut a. Hemi chungchang ngaihtuahtu Gauhati High Court Division Bench chuan, nimin khan interim judgement tichhuakin NLUP hnuaia \anpuina dawngtu tur thlan kawngah lang tlanga thil ti tur leh ram danpui Article 14 anga hma a lak hma chuan NLUP \anpuina sem chhunzawm tawh lo turin Mizoram Sorkar a hriattir a, hemi chungchang hi Gauhati High Court chuan chawlhkar 4 hnuah ngaihtuah chhunzawm turin a dah a ni.