Mizoram Pradesh Congress Committee puipate vawiina \hukhawmin All India Congress Commitee President, Rahul Gandhi chu President ni chhunzawm zel tura an duh thu an sawi.

0
418
views

MPCC hotute hi vawiin khan Congress Bhavan-ah an \hukhawm a, Lok Sabha inthlanpui neih zawh taka Congress Party-in hnehna a chan zawh loh avanga AICC President, Rahul Gandhi-a’n President a nihna bansan a tum chungchanga Congress Working Committee-in Rahul Gandhi chu President a nihna chelh chhunzawm tura an ngenna chu an thlawp tih an sawi. MPCC chuan, Lok Sabha inthlan neih hmaa ram puma an Party tana a Campaign-naah Rahul Gandhi chuan hruaitu \ha tak a ni tih chiang takin a lantir tawh a ni, an ti a. Kha inthlanna neih zawh takah khan an tum ang leh duh angin sorkar-na siam thei ta lo mah se, inthlanna neih hmasak aia seat tam zawk an la thei chu hmasawnna ropui tak a ni a, a kaihruaina hnuaiah an Party chuan hma a sawn zel an beisei tih an sawi.

Rahul Gandhi chu India rama sakhaw zalenna a awm theih nana nasa taka beitu a ni tih sawiin, Mizo mipui hlauh awm em BJP kaihhruai sorkar-in sakhaw zalenna nuaibo a tumna lakah pawh Rahul Gandhi chuan a humhim a, sakhaw tenau zawkte nuaiboa an awm tur pawh a chhanchhuah zel an beisei tih an sawi.

MPCC chuan, Lok Sabha inthlanpui neih zawh taka an Party chak lo chu AICC President, Rahul Gandhi-a mimal mawhphurhna bik a ni lo tih sawiin, hei hi an za vaia mawhphurhna in\awm a ni, an ti a. Tun dinhmunah chuan India ram hian Rahul Gandhi chu AICC President a nihna chelh chhunzawm turin ala mamawh a, inthlanna neih zawh takah khan ram mipui vaibelchhe 12.5 chuangin an vote a, hei hi za zela chhuta 20 vel a tling tih sawiin, tun hmaa an dinhmun pha chiah rih lo mah se, Rahul Gandhi-a kaihhruaina hnuaiah tun hmaa an nihna chu an neih let a, tun hma ram tan rawng an lo bawl tawh \hinna chu an chhunzawm leh ngei an beisei tih MPCC chuan a sawi a ni.