Mizoram Football Association leh Zonet \angkawp buatsaih, Mizoram Premier League, Season 6-na chu nizan khan zawh fel a ni a, Chhinga Veng FC-in Final-a an bitum, Aizawl FC chu si khat faia hnehin an Champion. MPL season 6-naah hian Team 8 an tel a, Team tel zawng zawng hi vawi 2 \heuh an intum kual hnuah Point hmu sang 4-in Semi Final an khel a, Final chu nizan khan khelh a ni ta a, Chhinga Veng FC-in Champion nomawi an hlawh ta a ni. MPL Season 6-ah hian mimal lawmman chi hrang hrang sem a ni a, Goal khung hnem ber lawmman chu Mizoram Police FC Player Lalfakzuala’n a dawng a, Best Player-ah R .Malsawmtluanga Chhinga Veng FC, Best Defender-ah R. Laldinliana Chhinga Veng FC, Best Goalkeeper-ah F. Lalmuanawma Chanmari FC, Best Forward-ah H. Lalmuankima Aizawl FC leh Best Midfielder-ah R. Malsawmtluanga, Chhinga Veng FC thlan an ni. Nizana MPL kharna inkhawm hi MFA President, Health Minister, Pu Lal Thanzara leh Finance Minister, Pu Lalsawta’n an hmanpui a ni.
