Mizoram pumah Fire Prevention Week 2018 hmang tan

0
439
views

Ram ti kang lo tura inzirtirna hapta Fire Prevention Week 2018 chu Mizoram pumah vawiin atang khan hman tan a ni. Aizawlah chuan Home Minister Pu R Lalzirliana’n ATI Auditorium-ah a hawng a, thupuiah ‘Ram tikang lo turin mitin i fimkhur ang u’ tih hman a ni. Pu R Lalzirliana chuan, ram ti kang lo tura inzirtirna chuan hapta khat chhung chauh awh mah se, entik lai pawha chhunzawm a tul tih a sawi a, lo hal turte chu vah bak ram ti kang lo tura fimkhur tur leh tha taka mei kawng sial turin a chah a ni. Pu R Lalzirliana chuan, tul lova ram tih kanin nghawng tha lo nasa tak a thlen thin tih a sawi a, nungcha a suat bakah tuihna a ti kang a, mitin ram ti kang lo tura fimkhur a tul a ni a ti.
Ram a kan loh nana Mizoram pum huapa hmalatu, State Level Fire Prevention Committee hi kum 2000 khan din a ni a, kuminah hian lo neitute chu march ni 15 hmaa lo hal vek tura hriattir an ni.
——————-

Serchhip-ah chuan ram ti kang lo tura fimkhur inzirtirna hapta hi DC Conference Hall-ah Bawrhsap, Pi Sangchhin Chinzahin a hawng a, thu sawiin Bawrhsap chuan kum tina Mizoram chhunga ram zau tak kang chhe thin chu ram neitu mipuiten an mawhphurhna an hriat loh vang a ni tih sawiin, harh thar turin mipuite a ngen a, kum tina lo leh huan hal thin chu tun dinhmunah pumpelh theih a la nih loh avangin vah bak ram ti kang lova, lo leh huan hal tum turin mipuite a chah a ni. He inkhawma thusawitu dang, Serchhip District MJA President, C. Ramengmawia pawhin kum tina hmun tam taka ram a kan thinna chhan chu mipuite fimkhur tawk loh vang niin a sawi a, lo hal hun tura sorkar ruat chu zawm vek a tul thu a sawi bawk. He inkhawmah hian District Fire Prevention Committee Member Secretary, Thenzawl DFO, Pu Lallianzuala pawhin thu sawiin khaw hrang hrangah ram tikang lo tura mipuite zirtirna neih tum a nih thu a sawi bawk. He inkhawm hi Serchhip Sub Hqrs. YMA President, Pu R. Sanghmingthanga’n a kaihruai a ni.
——————-

District hrang hrangah pawh vawiin khan ram kang ven hapta hman tan a ni. Kolasib-ah chuan he hapta hi Taitesena Hall-a inkhawmah Bawrhsap, Pu R. Zarzosanga’n a hawng a, hawnna thu sawiin Bawrhsap chuan ram kangin khawvel boruak nasa taka a tih chhiat thu te, khawvel sik leh sa awmdan a tihdanglam theih dan te, USA leh Europe rama ram changkang te pawhin ram kang thin an buaipui thu te, Mizoramah pawh ram kang avanga ram zau tak a chhiat thin thu te sawiin, ram kang veng tura nasa zawka tan la turin mipuite a ngen a ni. He inkhawmah hian Kolasib Range Officer, Pu C. Lalrinmuana chuan ram kang veng tura hmalak dan tur a lem nena entirin a tarlang a ni. He inkhawm hi Kolasib Sub Hqrs. YMA President, Pu C. Liankunga’n a kaihruai a ni.
——————–

Mamitah chuan ram kang veng tura inzirtirna hapta hi Govt. Mamit College Conference Hall-ah Bawrhsap, Pi Lalbiaksangi’n a hawng a, thu sawiin Bawrhsap chuan ram kang ven chu thing leh mau tam tak bakah tui hna humhalh nan thil tangkai niin a sawi a, bawlhhlawh tawih thei lo chi pawh leilung tichhetu a nih avangin a tihral danah fimkhur turin mipuite a chah a ni. Bawrhsap chuan Mamit District chu Atal Mission for Rejuvenation and Urban Transformation (AMRUT) hnuaia khawpui cheibawl tur thlanchhuah 115 zingah a tel avangin tihmasawn tura cheibawl tum niin a sawi a, International Fund for Agricultural Development (IFAD) Expert Member ten nikuma thil awmdan enfiahna an lo neih tawh angin Mamit District chu kut hnathawktute dawmkanna Project hrang hrang neih nan thlan a nih thu a sawi bawk. He inkhawm hi Mamit Sub Hqrs. YMA President, Pu Zatluanga Sailoin a kaihruai a ni.
——————-

Lungleiah chuan ram kang ven pawimawhzia inzirtirna hapta hi Lunglei Convention Centre-ah High Powered Committee Vice Chairman, Pu S. Laldingliana’n a hawng a, hawnna thu sawiin mihring lo awm zel turte luah tlaka Mizoram siam turin ram neituten thing leh mau, nungcha leh boruak thlenga humhalhna chang hriat a tul a ni a ti a, kum tina ram kang hian boruak, leilung leh sik leh sa awmdan a tihchhiat bakah buh leh thlai thar chhuah pawh a tha lo zawngin a nghawng niin a sawi a, kangmei laka ram humhalh turin mitin tangrual turin a ngen a ni. He inkhawmah hian DFO, Dr. C. Vidhyasagar pawhin thu a sawi a, inkhawm hi Additional DC, Pu Benjamin Lalzama’n a kaihruai a ni.