Mizoram pumah Road Safety Week hmang tan

0
602
views

Mizoram States Road Safety Council buatsaihin Lirthei chetsualna thleng thei laka fimkhurna hapta, Road Safety Week chu vawiin atang khan Mizoram pumah hman tan a ni. Aizawlah chuan hapta hawnna inkhawm hi Assembly Annexe Conference Hall-ah neih a ni a, a hmanpuitu Transport Minister, Pu John Rotluangliana chuan, lirthei khalhtute chu karkhat chhung chauh ni lo an dam chhunga Road Safety hmang turin a chah a ni. Mizorama lirthei chetsualna chhan tam ber chu a khalhtute fimkhur tawk loh vang a nih thu leh lirtheia chetsualna tam zawk chu kawng thatna hmun leh kawngpui zau laia thleng a nih avangin fimkhur zawka lirthei enkawl a tul tih a sawi. Pu John Rotluangliana chuan, lirthei tlanchak zawng pawh khauh taka kenkawh a tul thu leh tlan chak lutuk leh tlan muan vanga midang tana harsatna siam thei ang chi pawh khuahkhirh a tul thu a sawi a. Mizoramah kawngpui a lian lova, lirthei a tam bawk si avangin lirthei khalhtute an hawihhawm lehzual a ngai a, lirthei dang nena an in tawh tuma tlawmngai zawk an nih hian nunna tam tak a chhan thei tih hre tur te, rui chunga lirthei khalh chu dan bawh chhiatna a ni tih hre thar tur tein a chah a ni.

Hapta hawnna inkhawm hi Transport Secretary, Pu H.L. Rochungnunga’n a kaihhruai a, kalkhawmte chuan fimkhur tura intiamna thuchah an sawi rual a ni. He hapta hi tun thla ni 18 thleng hman tur a ni a, kuminah hian thupui atan ‘fimnkhur takin lirthei khalh la, nun chhan him rawh’ tih hman a ni a. Hapna hman a nih chhuang hian lirthei chetsualna thleng thei laka fimkhur tura inzirtirna atan Panel Discussion-te, Live phone-in Programme leh Driver-te tan a thlawna inentirna te buatsaih a ni ang. Report atanga a lan danin, kum 2016 khan Mizoramah lirthei chetsualna vanga nunna chan mi 70 an awm a, nikum chhung khan mi 51 in nunna an chan bawk.
—————-

District hrang hrangah pawh vawiin atanga khan lirtheia chetsual lohna tura fimkhur hapta, Road Safety Week hman tan a ni. Lungleiah chuan he hapta hi Venglaia Police Station kawtah Bawrhsap, Pi Lalzarmawiin a hawng a, hawnna thu sawiin Bawrhsap chuan Ministry Transport & Highway-in a zirchianna atangin ram puma lirthei chetsualna thleng zinga za zela 75 chu motor khalhtute fimkhur tawk loh vang a ni tih hmuh chhuah niin a sawi a, Mizoramah chuan chetsualna thleng zinga za zela 95.5 chu motor khalhtute fimkhur loh vang a ni a, lirthei chetsualna avanga mi tam tak nunna hlu tak chan a ni thin chu thil pawi tak a nih avangin he hapta thupui, “Fimkhur Takin Khalh La, Nun Chhanhim Rawh” tih chu engtiklai pawha vawng reng turin lirthei khalhtute a chah a ni. He hapta hawnnaah hian Lunglei Additional SP, Pu Lalchhuanthanga pawhin
thu sawiin lirthei khalhtute chu lirthei khalh dan tha taka zawm turin a chah a, Lunglei khawpuiah kawng a zauh theih tawh loh avangin lirthei pung zel avangin harsatna a thleng chho mek niin a sawi bawk. He inkhawm hi District Transport Officer, Pi Saizikpuiin a kaihruai a, Chairman chuan he hapta hman chhung hian Autorickshaw, Taxi leh Maxi-Cab Driver tha ber te an Association theuhin an thlang chhuak anga, chungte chu lawmman pek an ni dawn niin a sawi a, school hrang hrangah lirthei khalh kawnga fimkhur a tul thu inzirtir tum niin a sawi bawk a ni.
———————

Serchhipah chuan he hapta hi DC Conference Hall-ah Bawrhsap, Pi Sangchhin Chinzahin a hawng a, hawnna thu sawiin Bawrhsap chuan lirtheia chetsualna pumpelh nan lirthei khalhtute bakah lirtheia chuangte leh kawnga kalte thlenga fimkhur a tul tih a sawi a, lirthei tlan ngaihtuah lova a huhova kawngpuia kal ching lo turin mipuite a chah bawk a ni. He hapta hawnnaah hian Serchhip SP, Pu Lalringdika chuan khawvel thang chho zelah sualna chi hrang hrang nasa taka a pun laiin Mizoramah kum 2016 chhung aiin kum 2017 chhungin lirtheia chetsual vanga nunna chan an tlem chu thil lawmawm niin a sawi a, ngaih hna thiamna tel lova lirthei khalhtute leh an lirthei Police ten an enfiah thin chuan chetsualna a tih thlem phah nia a hriat thu a sawi bawk. He inkhawm hi BDO, Pu Lalrinsanga’n a kaihruai a, hapta hman chhung hian Serchhip-a lirthei zawng zawng, mihring phur chi zawng zawngte chu training pek tum an ni a, driver tha thlan chhuah tum niin a sawi bawk.
———————

Kolasib-ah chuan Road Safety Week hi Diakkawnah SDPO Pu C. Lalmalsawma’n vawiin khan a hawng a, thu sawiin SDPO chuan kum 2016 khan lirtheia chetsual vangin mi 66 an thi a, kum 2017-ah mi 51 an thi tih tarlangin motor chetsual vanga thi hi Mizoramah an tam hle a, hei hian fimkhur a ngaih zia leh lirthei khalh dan zawm a tul zia a tilang niin a sawi a, SDPO chuan rui chunga motor khalhte, zial zu chung emaw, mobile phone hmang chung emawa motor khalh chu dan a nih loh thu leh chetsual phah theihna a ni tih a tarlang bawk. Kolasib District-ah hian he hapta hman chhung hian Police leh Transport Department tangkawpin No Tolerance week hmangin lirthei khalhtute training an pe ang a, an lehkha neihte leh a khalhtute an enfiah dawn bawk a ni. He hapta hawnna inkhawm hi District Transport Officer, Pu R. Lalnunmawia’n a kaihruai a ni.
——————–

Mamitah chuan Road Safety Week hi tukin khan Field Vengah Bawrhsap, Pi Lalbiaksangi’n a hawng a, inkhawm hi District Transport Officer, Pu H. Lalhmingliana’n a kaihruai a ni. Thuchah sawiin Bawrhsap chuan lirthei khalhtute chu englai pawha fimkhur tur an ni tih sawiin, he hapta hi khar lova kumtluana hman tur niin a sawi a ni. SP, Pu Naryan Thapa pawhin thu sawiin Road Safety Week hman avangin Mizoramah lirtheia chetsualna a tlem niin a sawi a, chetsualna chhan ber chu motor khalhtute fimkhur loh vang leh motor khawl fel loh vang a nih thin avangin motor khalhtu zawng zawngte chu an motor dinhmun hre chiang turin a chah bawk. He inkhawmah hian Mamit Chief Medical Officer, Dr. C. Zothankhuma pawhin chetsualna thlen thluha hliamte sawngbawl dan leh enkawlna atana thil tul hmasa a sawi a ni.
——————