Mizoram PWD-in thal chhunga kawng pawimawh zual siam that hman tum

0
1103
views

Mizoram PWD chuan tun \hal chhunga Mizoram chhung kawng pawimawh zual siam tha hman turin ngawrh takin hna an thawk zel niin an sawi. PWD hotute hnen atanga thudawn danin National Highway 54 chu Serchhip atanga Tuipang thleng siamthat zawh a ni tawh a, a bak pawh tunah hian ngawrh taka siamthat a ni a, Lailapur leh Bilkhawthlir inkar kawng alkatra luan thar hna pawh Sunshine Overseas Ltd. in an thawk mek a ni. Hetihlai hian Aizawl-Thenzawl-Lunglei World Bank kawng siamthat hna pawh Hmuifang Division leh Lunglei Division ten ngawrh takin an thawk mek a, Lunglei Division hian Tlawng leh Pukpui inkar kawnga tui chhuahna leh lei nemna lai chu concrete-a siam turin hna thawh mek a. Seling-Champhai kawngah chuan Seling atanga Keifang thleng kawng siamtu Contractor, Nidhi Infrastructure Ltd. chuan a blacktop zo tawh a, amaherawhchu, he kawngah hian hmun hnawng lai leh tui chhuah thinna, a pumpuia belhkhawma km 1 vel chu blacktop theih a la nih loh avangin khaw tuihul hun nghah rih a ni. Nidhi Infrastructure Ltd. bawk hian Kawlkulh leh Khawzawl inkar kawng blacktop hna tunlai hian an thawk mek bawk a, he hna hi tun thal chhunga zawh hman tum a ni. Hetihlai hian Keifang leh Kawlkulh inkar te, Khawzawl leh Champhai inkar kawng te chu tun dinhmunah siamthat theih a la ni rih lova, blacktop na turin Ministry of Road Transport & Highway-ah DPR bawhzuiin PWD Officer te tunah hian an thang mek a, tender chhuah thuaia kumin chhunga hna thawh tan theih tuma hmalak mek niin PWD hotute chuan an sawi a, he kawngah hian kumtluana tha taka motor a kal theih nan kawng thawm that hna erawh an thawk zui zel dawn tih an sawi. Seling-Champhai kawng pumpui siamthat hnathawh a muan chhan hi a hmalama kawng enkawltu Border Road Organization-in Mizoram PWD kuta an hlan har vang niin PWD hotute chuan an sawi.