Mizoram rualin vawiin khan Rajasthan, Madhya Pradesh, Chhattisgarh leh Telangana-ah te Assembly Inthlan atana vote tla chhiar a ni.

0
674
views

Puan tawh angin Madhya Pradesh leh Chhattisgarh-te hi thla hmasa ni 12 khan an inthlang a, Rajasthan leh Telangana te hi tun thla ni 7 khan an inthlang ve leh bawk a ni.

Seat 90 awmna Chhattisgarh-ah chuan Congress an chak fal hle a, sorkarna siam tura seat lak ngai zat, 46 chu khumin, seat 65 an la a, anmahni hnaih bertu BJP chuan seat 17 an la ve thung a ni.

Rajasthan-ah erawh chuan party mal sorkarna siam thei an awm lo a, Congress-in seat 200-ah 99 an la a, sorkarna siam thei tur chuan 101 lak a ngai a ni. Central-a sorkar lai BJP chuan seat 74 an la ve thung a.

Madhya Pradesh lamah pawh party mal sorkarna siam thei an awm dawn lo a, Congress-in seat 113 an lak laiin BJP chuan 108 an la ve thung a, sorkarna siam tur hian seat 116 lak a ngai a ni.

Telangana-ah chuan K Chandrashekar Rao-a din, State Party, Telangana Rashtra Samithi an chak ve thung a, seat 119 awmna seat 87 an la a, anmahni hnaih bertu Congress chuan seat 19 chauh a la phak a ni.