Mizoram sorkar hnuaia Commissioner For People with Disabilities, Dr. Lalnunthara’n vawiin khan Govt. Lawngtlai College-ah rualbanlote tana sorkar dan siam leh anmahni duhsak leh humhalh an nih dan a sawifiah.

0
440
views

Dr. Lalnunthara chuan pianphunga rualbanlote humhalh nan sorkar chuan The Rights of Persons with Disabilitiesa Act, 2016 tih a siam a, heng mite hian endawng leh thleibikna awm lova an chanvo dik taka an chan theih nan dan angin hmalak a ngai a, dan anga duhsakna pek a nih avangin Mizoramah pawh mi 60 velin hna an hmu tawh a, zirna sang zawka an zir theihna turin rualbanlote tan seat za zela 5 hauhsak a ni a, ngaihhna thiamna pawh kum 5 thleng pek an ni a ti. Dr. Lalnunthara chuan zirna in hrang hrangah rualbanlote en hran loh tur a nih thu te, sorkar hnathawkte tan pawh an lungawilohna leh vuivaina thlenna tur Grievance Redressal Officers ruat an nih thu te leh lo neih lamah leh hmasawnna hna chi hrang hrang thawhnaah rualbanlo hmeichhia te chu duhsak bik tur an ni tih a sawi a ni. Dr. Lalnunthara chuan tunah hian Mizoramah rualbanlo chhinchhiah zat mi 15,160 an awm a, chungte chu mipa 8,198 leh hmeichhia 6,962 niin a sawi. He inkhawm hi Government Lawngtlai College Principal, Pu T. Thang\huama’n a kaihruai a ni.

Dr. Lalnunthara hian Lai Autonomous District Council hnuaia Officer-te kawmin, dan anga pianphunga rualbanlote humhalh dan leh an chan tur dik tak an chan theih dan tur a sawipui bawk a ni.

PwD Commissioner hian vawiin khan Siaha a pan a, naktukah Govt. Siaha College leh Mara Autonomous District Council-ah pianphunga rualbanlote danin a humhalh dan leh an chanvo dik tak an chan theih dan tur chungchang a sawipui dawn a ni.