Mizoram sorkar leh HPC-D hel pawl-ten inremna thu thlung

0
724
views

Remna zawnga Mizoram sorkar leh HPC-D hel pawl inbiaknaah vawiin khan inremna thu thlun a ni ta. Vawiina inbiakna an neih zawha thuthar lakhawmtu thenkhat zawhna chhangin, he inbiaknaa Sorkar lam aiawh hruaitu, Chief Minister Political Adviser, Pu Lalrinmawia Ralte chuan, kum 2016 August thlaa inbiakna tan a nih atanga thu inchuh an lo neihte chu tun tuma inbiakna hian harsatna awm lovin tlang takin an sawi ho tih a sawi a. Tuna inremna an siam chu Sorkar hotute hnenah thlen a ni ang a, chumi hnuah inremna atana thil tul pawimawh hrang hrang chu a tul anga bawhzui chhoh zel a nih tur thu a sawi.

He inbiaknaa HPC-D lam aiawh, an thupuangtu nibawk Pu Lalthalien pawhin, an beisei duh ang ngeia Mizoram Sorkar nen inremna an siam thei ta chu lawmawm a tih thu a sawi a. Inremna an siamah hian lungawi lohna engmah an nei lo tih a sawi.

Remna kawng zawnga Mizoram sorkar leh HPC-D hel pawl inbiakna hi kum 2016, August ni 10 atang khan Official Level-ah tan a ni a, nikum September ni 22-a inbiakna neih a nih tum khan inbiak lehna hmasa ber chu thuneihna sang zawk Political Level-a neih ni se tih a nih angin nimin chawhma dar 11 khan Chaltlanga State Guest House-ah inbiakna hi tan a ni a. Nimina inbiaknaah hian inremna siam tura Sorkar lam leh HPC-D helpawl duh dan leh ruahmanna hrang hrang thlir ho niin, rawtna awmte chu uluk zawka an ngaihtuah theih nan vawiina inbiak chhunzawm leh tura thu dah a ni a. Hemi anga vawiin chawhnu dar 1-a inbiakna chhunzawm a nih hnuah inremna hi siam a ni ta a ni. He inbiaknaah hian sorkar lam chu Chief Minister Political Adviser, Pu Lalrinmawia Ralte MLA leh Law Commission Chairman, Pu John Siamkunga MLA-in hovin, an ni bakah hian Planning Secretary, Pu C. Vanlalramsanga, Additional Home Secretary, Pu Lalbiakzama, GAD Jt. Secretary, Pu Vanlalmawia, CID Special Branch SP, Pu Rodinhgliana Chawngthu, RD Director, Pu Lalhriatpuia, Home Dy. Secretary, Pu R. Lalthazuala, OSD Home, Pu David H. Lalthangliana leh Home Under Secretary, Pu Zahmingthanga an ni a. HPC-D aiawhte chu an Working Chairman, Pu LT Hmar hovin, Pu Lalthalien, Dr. John Pulamte, Pu Lalthlamuana Hmar, Pu David Buhril, Pu Lalrammuanpuia, Pu Lalmalsawma Darngawn, Pu Rohringa, Pu Lalvenhima Hmar leh Pu HC. Lalmalsawma an ni a.