Mizoram sorkar leh HPC-D inbiakna March ni 7-ah sawn

0
383
views

Remna kawng zawnga Mizoram sorkar leh HPC-D inbiakna March ni 5-a neih tur chu remchan zawkna avangin March ni 7-ah neih a ni dawn. ZONET zawhna chhangin Home Minister, Pu R. Lalzirliana chuan, he inbiakna hi thuneihna sang zawk nei, Political Level-ah chhunzawm a nih tur thu leh he inbiaknaah hian Sorkar aiawh chu Political Adviser to Chief Minister, Pu Lalrinmawia Ralte leh Law Commission Chairman, Pu John Siamkunga’n an ho tur thu a sawi. He inbiakna kal lai chhunzawm dan tur hi tun thla ni 5 khan Home Minister, Pu R. Lalzirliana hovin a Pisa-ah Home Deptt. Officer ten an sawiho a, hetah hian inbiakna kalpui dan tur an ruahman nghal a, inbiakna hi March ni 5-ah chhunzawm tura tih ni mah se, remchan zawkna avangin March ni 7-ah neih a ni zawk dawn a ni. Puan tawh angin hemi hmalama Official Level-a inbiakna lo neih tawh chu nikum September ni 22 khan zawhfel a ni a, hetah hian Political Level-a thuneitu sang zawk nena inbiakna neih huna inremna thutlung siam dan tur chungchang pawh sawihova ruahmanna pawh siam lailawk a ni tawh a, chutah chuan Sinlung Hills Development Council chu Sinlung Hills Council tia a hming thlaka thuneihna sang zawk pek dan tur chungchang te, he Council hi Elected Member 12 leh Nominated Member 2 neia siam dan tur te leh remna thuthlung siam hnua remna thuthlung anga HPC-D hel pawl mi, nungphung pangngaia lo lette chhawmdawl zui dan turte pawh a tel a ni.