Mizoram sorkar leh HPC(D) te inbiakna krismas hmain chhunzawm dawn lo

0
631
views

Mizoram sorkara thuneitu sang zawkte leh HPC(D) hel pawlte inkara remna kawng zawnga inbiakna kal lai chu kumin krismas hma chuan chhunzawm a theih dawn ta lova, ZONET zawhna chhangin Home Minister, Pu R. Lalzirliana chuan inbiakna tlangkawmna atana inremna thuthlung duan lailawk leh inremnain a ken tel tur, ruahmanna dang duan lailawk tawhte chu Chief Minister, Pu Lal Thanhawla hnenah thawn vek a ni tawh a, hengte hi Chief Minister chuan tunah hian a bih chiangtu tur ruat te nen a zir chiang mek nia thu dawn a ni. Puan tawh angin kumin September ni 21 leh 22-a official level-a inbiakna chu hlawhtling taka zawh fel a ni a, khatah khan Sinlung Hills Council siamna tura Bill duan lailawk, Sinlung Hills Council Bill, 2017 chu sawihova thuneitu sang zawk hnena thlen remtih a ni a, inremna thuthlung, Memorandum of Settlement siam dan tur duan lailawk pawh chik taka thlir a nih hnuah thuneitu sang zawk pawmpui tura thawn remtih a ni a, hetah hian HPC(D) hel pawl nunphung pangngaia lo let tur te chhawmdawlna leh \anpui dan tur te leh HPC Area tia hriata remna leh muanna boruak \ha a awm zui zel theihna tura ruahmanna siam te pawh a tel a ni. Kha inbiaknaah khan Mizoram sorkar lam chu Home Dept-a Additional Secretary, Pu Lalbiakzama’n a hova, HPC(D) lam chu an Working Chairman, Pu Lalthangliana Hmar-in a ho a ni.