Mizoram sorkarin Aizawl khawpuia lirthei tawt tih ziaawmna tura lirthei dahna in tur sa theite tangkafaia \anpuina tur ruahmanna a siam, PAHOSS hnuaiah cheng vbc 4 leh nuai 73 pek chhuah a ni tawh a. Tun thlenga a dawng tur thlan chhuah tawh mi 343 te hnena sorkar sum pek tur chu a vaiin cheng vbc 55 leh nuai 70 a ni.

Zonet in RTI hmang zawhna a siam, UD&PA Dept in a chhan danin, PAHOSS hnuaiah hian Parking House sakna tura sum hmu tam zual, cheng nuai 100 chin chunglam hmu tur mi 5 an awm a, Hawla Indoor Stadium Rebublic Vengthlan bula satu tur C Vanlalhmuaka Zotlang Champhai chuan cheng nuai 141 a hmu dawn a, Aizawl Dam Veng Main Road-a parking house sa tur Eddie Ramdinthara chuan cheng nuai 105 a hmu dawn a, Kulikawn Indoor Sadium bula satu tur K Rothangliani chuan cheng nuai 150, Salem venga satu tur H Lalramliana chuan cheng nuai 106, leh Zemabawk Lungbial Venga parking house satu tur H Biakthuama chuan cheng nuai 200 a hmu dawn a ni.

PAHOSS hi Aizawl Municipal Corporation area huamchhung-ah hman tura duan ni a, khaw chhak lamah Zemabawk Lungbial leh Beraw Veng te, khawthlang lamah Maubawk, Luangmual leh Govt Complex Luangmual te, Hmar lamah Durtlang leh Durtlang Mualveng bakah ATC panna kawngpui sir te, Chhim lamah Saikhama Kawn leh Ngaizel ah te pawh \anpuina dawng tur hi an awm a ni.

Tun thlenga lirthei dahna in sa tura thlan tawh zat chu mi 343 an ni a, heng mite hi an sum hmuh tur thawh thuma pek chhuah tur an ni a, sum pek thawh thumna dawng an la awm lo a, parking house sa zo an la awm lo a ni. Tun thlenga PAHOSS hnuaia in sakna tur sum dawng tura thlan tawh mi 343 te hian an sa zo a nih chuan lirthei 5570 leng tura ngaih a ni.