General Administration Dept in vawiina hriattirna a tih chhuaha tarlan anih danin, Hnahthihal, Khawzawl leh Saitual District awptu tur Deputy Commissioner office hi din a ni a, heng khaw pathuma Civil Sub Division awmlai mek te chu nuaibo nghalin DC office thar hian a thlak nghal vek dawn a ni.
MNF sorkar hmasa hunlai, kum 2008 September ni 1-a council of minister \hukhawmin district pathum din hi a rel a, he thutlukna bawhzui hian Hnahthial, Khawzawl leh Saitual District din tura hriattirna notification chu September ni 12, 2008 ah tih chhuah a lo ni tawh bawk a, 2008 December ni 2-ah Assembly inthlan neih zui a ni a, sorkar lai MNF party chu tlain, Congress party in sorkarna a siam a, Mizoram sorkar sum dinhmun enin district thar te hi a taka tihpuitlin theih a ni lo nia sawiin Congress sorkar chuan a bawhzui lo a, nikum kum tawpa Assembly inthlanpui neih dawna an intiam angin MNF sorkar thar lo piang chuan district pathumte bul\anna tur sum hi 2019-2020 budget, vote on account hmanga kumin March thla-a pass takah khan dahin DC office thar pathum te hi din a ni ta a ni.
