Mizoram State BJP President thar atan thlan a nih lawmna puala Aizawl-a an Party Pisa-a thuthar lakhawmtute a kawmnaah Pu Vanlalhmuaka hian zawhna chhangin MNF leh BJP thawh dun leh dun loh chungchangah Chief Minister, Pu Zoramthanga’n sorkar an siam tirh khan NDA an nih thu a sawi a, NDA chu BJP thawhpui an nih avangin BJP chuan an tih tur tak tiin Mizoram a\anga Lok Sabha member awm chhun Pu C. Lalrosanga chu a \hutna tur dik takah an \hut tir a ni a ti a. MNF kaihhruai Mizoram sorkar ve thung erawh chuan NDA -a an thawhpui Mizorama BJP MLA awm chhun Dr. BD Chakma chu a \hutna tur dik takah an \hut tir rih lo a ni a ti a, he thilah hian Mizoram BJP chuan phut neiin hma la dawn lo mah se, engtikah nge Dr. BD Chakma chu a \hutna tur dik takah an \huttir dawn tih an en mek tih a sawi.
Pu Vanlalhmuaka hian BJP chu kalphung nghet tak nei, central a\anga khaidiat fel tak neia hmala \hin an ni, a ti a. Hma a lak chhohna turah an party-in Mizorama hma a sawn zel theih nan theihtawp an chhuah dawn a. Mumal taka an indin chhoh hnuah Party worker-te tan huamzau zawka BJP kalphung inzirtirna neih an tum tih a sawi a, hei hi an zawhfel hnuah Sorkar laipuiin miharsa zawkte tan ruahmanna hrang hrang a siam 200 dawn zingah Mizoramah engzat nge chhawr \angkai a nih tih leh a dawng tur dik takin an dawng em tih enfiah a ni dawn a, thil dik lo awm an hmu a nih chuan a tidik lotuten an tawrh theih nan hmalak an tum tih a sawi a, hei bakah hian central scheme te mipui tam zawkin an chhawr theihna turin sum tam zawk hailut tura \anlak an tum tih a sawi.
Pu Vanlalhmuaka chuan, nikum kumtawp lama Union Home Minister, Pu Amit Shah-a’n Mizoram a lo tlawh \uma Mizoram mamawh an lo thlen zingah hriselna kawnga hmasawn tura AIMS tlukpui damdawi in Mizorama dah tur te, Lengpui Airport chu International Standard-a tichangtlung tur leh Mizoram chhim lama Airport thar din tur leh kawngpui hrang hrang siam \ha tura rawtna te a tel tih a sawi a, Mizoram sorkarin an duh anga hma an la chak thei lo a nih chuan Mizoram State BJP chu anmahni \anpui turin an inpeih tih a sawi.
Zonet zawhna chhangin Pu Vanlalhmuaka chuan, tunah hian Mizoram BJP-ah member sing 7 vel inziaklut an awm mek niin a sawi a, heng zinga mi sing 1 tal Active member ni tura chher an tum tih a sawi a, active member ni tura mi 25 BJP-a hruailuh ngai \hin chu 100-a tihsan a ni dawn a, hei hi an tih theih phawt chuan 2023 ah Sorkar an siam thei tih chu an rindan a nih thu a sawi.
