Party pahnih-in an tel loh chhana an sawi, Mizoram People Forum (MPF) leh Political Party-te inremnaah MPF buatsaih ni lovah chuan eng platform-ah mah tel phal a nih loh thu an sawi chu thu dik tawk lo a ni an ti a, MPF leh Political party-ten inremna an siamah chuan, inthlan puan a nih hnuah chuan Joint Platform hi neih loh ni se. MPF-in a \ul a tih chuan state level-ah neih theih a ni ang a. MPF buatsaih a nih loh chuan Joint Platform-ah hian eng party mah tel tur a ni lo tih a ni a. Inthlan puan a la nih loh avangin MZU buatsaih joint platform hi MPF Thuthlung hian a khap lo a ni an ti a, Inthlan puan a nih hnuah chuan tih chu haiderin MNF leh Congress party hian chhuanlam siamin Mizoram University zirlaite leh Mizo mipui an bum a ni an ti a. An chhuanlam hmang hian MPF leh Political Party -te thawh hona thuthlung an tibawrhbang nia an hriat thu leh Varsity Platform-a an tel ngam loh dan a\angin MNF leh Congress Party hian thingtlang lam tih hmasawnna tur te, zirna leh ramri chungchangah te hmachhawp an nei lo niah ZPM chuan a ngaih thu an sawi.
Kumin Assembly inthlanpui neih tura Joint NGO Co-Ordination Committee-in nikum August ni 18-a Chakma Candidate nei lo tura Political party hrang hrang a ngenna chu ZPM chuan a takin a tihlawhtling dawn tih an sawi a. Political party dang MNF, Congress leh BJP chu tlawmngai pawlte ngenna hi an tihlawhtling ve dawn em tih chu ZPM chuan a zawt tih an sawi.
Puan tawh angin Mizoram University Students Discussion Forum-in nimin khan Varsity Platform 2018 a buatsaih a. Hetah hian Congress leh MNF chuan aiawh an tir lova, an party hotute chuan MPF nen inthlan kaihhnawih thawh hona thuthlung an siamah MPF huaihawt ni lo vantlang inkhawmah tel phal loh a nih avangin an tel ve ta lo niin an sawi a. He inkhawma Key Note Address sawi tura ruat Vanglaini Editor, Pu K. Sapdanga chu ZPM mi leh sa, Aizawl East biala ding mai tur a nih avangin an tel ve a rem lo nia an hriat thu an sawi a. Hemi bakah hian MPCC chuan, MZU Students’ Discussion Forum hruaitute hnena lehkha an pekah he Programme-a welcome Address sawi tur MZU Students Welfare Dean, Prof. F. Lalnunmawia chu Aizawl South III biala MNF Ticket-a ding tura inbuatsaih mek a nih avangin Varsity Platform-ah hian an tel ve theih loh thu an hrilh a ni.
Versity Platform-a tel zirlaite hi an ngaihdan lakkhawm a ni a, chutah chuan Chief Minister atan Pu Lalduhoma’n duhtu a ngah ber laiin Chief Minister ni leh tura rinkai ber chu Chief Minister nilai Pu Lal Thanhawla a ni thung a, MLA ni laite zinga zirlaiten \ha an tih ber chu MNF MLA Pu Lalruatkima a ni.
