Mizoram Youth Commission Chairman, Pu Joseph Lalhimpuia chuan UPSC leh sorkar laipui hnuaia Competitive Exam hrang hranga inziak tlingte hnenah Incentive Cash Award pek a ni dawn tih a sawi

0
1801
views

Mizoram Youth Commission Chairman, Pu Joseph Lalhimpuia chuan UPSC leh sorkar laipui hnuaia Competitive Exam hrang hranga inziak tlingte hnenah Incentive Cash Award pek a ni dawn tih a sawi. He thu hi vawiina New Secretariat Complex-a a Pisa-a thuthar lakhawmtute a kawmnaah sawiin, thalaiten kawng hrang hranga hma an sawn theih nan tan lak mek a nih thu leh Civil Service (Main) Examination, Combined Defence Services Examination, NDA leh NA Examination-a inziaktlingte chu an inbuatsaih chhunzawmna atan leh lawmpui nan cheng nuai 1 pek a nih dawn bakah Civil Service (Prelims) Examination, Combined Medical Services Examination, Indian Engineering Services Examination leh Service dang danga inziaktlingte chu cheng sing 5 zel pek an nih tur thu sawiin, hemi atan hian RE atangin cheng nuai 30 leh NEDP atangin cheng nuai 80 dah a ni tawh niin a sawi. Zawhna chhangin Pu Joseph Lalhimpuia chuan, hetianga ruahmanna an siam chhan chu Mizo thalai tam thei ang ber Central Service-a an inziah tlin theihna tura duan a nih thu leh tuna pawisa dah sa-in a daih bak inziaktling awm se tih chu Sorkar duh dan niin a sawi. MYC Chairman chuan Mizo thalai tam zawk zirna in thaa an luh theih nan kumin atangin Aizawl leh Lungleiah IIT-JEE leh NEET Coaching Centre din a nih tur thu leh hemi atan hian Aizawla Coaching Centre awmsa chu tawhpui tur niin, zirlaite zirna senso zaa 75 tumsak a ni dawn niin a sawi bawk. Lungleiah chuan Coaching Centre mumal a la awm loh avangin MYC-in zirtirtute lawmman tumin Coaching Centre hi din a ni dawn tih sawiin kawng hrang hranga hmasawn tura infuihna leh inzirtirna atan kumin chhungin District tinah Youth Summit cum Road Show buatsaih tum a nih thu leh Aizawlah chuan March ni 22 leh ni 23-ah neih a nih tur thu pawh Pu Joseph Lalhimpuia chuan a sawi bawk. Kohhran leh tlawmngai pawl hrang hrang hruaituten khawvel zau zawk an thlir theih nan State pawnah an zin chhuah theih dan tur ruahman a nih tur thu leh High School leh Higher Secondary School zirlaite tan pawh Mizoram chhung hmun hrang hrang an tlawh theih nan remchanna siamsak a nih tur thu a sawi bawk.