Mizoramah chak zawka Gas phurh luh a nih theih nan a phurh man, Support Price pe tura ruahmanna siam a nih thu Supply Deparment hotuten sawi

0
500
views

Mizoramah chak zawka Gas phurh luh a nih theih nan a phurh man, Support Price pe tura ruahmanna siam a nih thu Supply Deparment hotuten Zonet an hrilh a. Hemi atan hian thutlukna chiang tak la awm lo mah se, Gas phurh man chu Cylinder pakhat zelah kilometre bithliaha Support Price hi pek tur niin, a Rate tur erawh Sorkar-in a ruahman dawn niin an sawi. Supply Deparment hotute chuan, tun hnaia eirawngbawlna Gas harsat chhan chu a phurh chhuah kawngah harsatna an tawh vang a nih thu an sawi a. Mualkhang Gas Bottling Plant leh Assam-a Borkhola Bottling Plant chu Mizoram mamawh chawk luhna pui ber a nih thu sawiin, Mualkhang chu Aizawl khawpui pawn lamin Gas an lakna ber a ni a, helai hmun atanga Gas phurtu Contractor-in a phurh man an chhan hniam avangin tun hnaiah Gas an phur chak lova, hemi vang hian thingtlang hmun hrang hrangin harsatna hi an tawh phah niin an sawi. Supply Deparment hotute chuan, Gas harsatna sukiang tura theihtawp chhuah a nih thu leh tun hnaia an Department-in Truck thar 3 a neih chu Gas phurh nana hman theih turin MIZOFED kaltlangin IOC-ah dil mek a nih thu an sawi. Tun hnaia Gas harsat zualna hmun Lunglei, Siaha, Champhai, Serchhip leh Mamit Area chu Mualkhang-in a chawm vek an ni a, heng hmun hrang hrangte hian Mualkhang chauh ni lo, Borkhola atang pawha Gas an lak theih nan IOC hotute biak rawn mek an nih thu Supply Deparment hotute chuan an sawi bawk.