Mizoramah Rashtriya Ekta Diwas hmang

0
434
views

Ram inpumkhatna ni, Rashtriya Ekta Diwas chu vawiin khan ram chhung hmun dang rualin Mizoramah pawh hman a ni a, Aizawlah chuan Sipai Lammualah sorkar hnathawkten a huhovin ram inpumkhatna atan thu an tiam a, an thu tiam hi Larsap Lt. Gen. Nirbhay Sharma-in a kaihruai a ni. He ni hi tluang taka hman a nih theih nan Mizoram sorkar chuan a hnathawkte tan vawiin chawhnu khan sorkar pisa chhuahsan a phalsak a ni.

——

Siaha-ah pawh Hnam Inpumkhatna Ni ‘Rashtriya Sankalp Diwas’ hi tukin dar 9:30 khan Mara Autonomous District Council-a Chief Executive Member, Pu N. Zakhai hovin District Playground-ah hman a ni a. Pu N. Zakhai chuan, ram inpumkhatna vawng nungtu leh venghimtu nih tum theuh turin mipuite a sawm a. Siaha Bawrhsap, Pi Harleen Kaur pawhin ram hmasawnna bul chu remna leh muanna a ni tih hre thar turin sorkar hnathawkte a chah a ni. He Ni pual hian zirlai naupangten Peace Rally an nei bawk a ni.

———-

Mamit-ah chuan DC Office-a SDC Pi Lalzikpuii hovin he ni pual hian Mamit Dinthar venga JNV Campus atanga Bazar veng thleng kawng zawh a ni a. Ram leh hnam inpumkhatna atan tharum tel lova ngaihtuahna sengtu ni turin thu an tiam bawk a ni.
——————

Serchhipah pawh vawiin chhun khan Bazarah he ni hi hman a ni a, District Bawrhsap, Pi Sangchhin Chinzah hovin kalkhawmten remna leh muanna vawnghimtu ni turin thu an tiam rual a ni. Serchhipa he ni hmanna hi Addl. DC, Pu Chuauhnuna’n a kaihruai a ni.