MNF-in ro a rel chhunga mi rilru tih a tihnat te ngaihdam MNF Vice President-in dil

0
351
views

Kum 10 MNF-in ro a rel chhunga mi rilru tih nat an neihah te MNF Vice President Dr R Lalthangliana’n ngaihdam a dil. Vawiina Tuikum MNF Block Conference vawi 3-na Ngentiang Community Hall-a neih a hmanpuinaah ngaihdam hi a dil, kum 10 thuneihna an chan chhungin ram leh hnam tan thil tha tam tak tih nei mahse mi rilru tih nat leh thil tih that tawk loh pawh tam tak an neih a rin thu a sawi a ni. Dr R Lalthangliana chuan, kumin Assembly inthlanah thuneihna an chan chuan, SEDP hmangin hma an la ngal phat dawn niin a sawi a, Congress in NLUP tlemte tea a sem ang ni lovin chhungtin ten eizawnna ngelnghet an neih theih ngeina tura hmalak chu an tum ber niin a sawi. Bialtu MLA Pu Lalrinawma pawhin thusawiin MLA fund chu mipui sum a nih angin bial chhungah semzaia tha taka hman a ni thin niin a sawi a, MNF hunlaia Health Care Scheme a kalpui chu tunah chuan mipui tan a chhenfakawm ta lo nia sawiin, thuneihna an chan hunah ennawna mipui tana chhenfakawm tur bera siam that an tum niin a sawi. Pu Lalrinawma chuan, zirna lamah sorkarin transfer & Posting dan mumal awm loa thil a kalpui avangin zirlai ten nasa takin an tawrh phah niin a sawi a, hmehriat nei tha zirtirtute chauhin Post tha an chang nia sawiin an party in thuneihna an chan chuan dan thar siamin Education system tha tak an kalpui dawn niin a sawi. Conference hi Tuikum MNF Block President Pu T.Sangzuala’n a kaihruai a ni.