MNF Senior Vice President, Pu Tawnluia’n an party-in Total Bandh buatsaih a tum chhan chu Congress sorkar dawngdah vang niin vawiina Mizo Hnam Run inkhawmah a sawi a, sorkar chu kawng siamna tur sum tam tak dah chunga siam tum lova Car man to lei ta zawkah a puh a ni. Mizoram sorkarin mirethei te chu an VIP-te nia sawi si-in, an chak lakna ber kawng chhia an siamsak duh lova, anmahni chuan Helicopter hmangin kawng chhia an thlawh khum zel thung si niin a sawi. Pu Tawnluia chuan, hmun tam takah kawng chhiat avanga lirthei tlan ngam lohna a awm tawh niin a sawi a, Mizoram chak lakna pawimawh, Bairabi kawng pawh lirthei tan kal ngaihna awm lo khawpa chhia nia sawiin, zin mite pawh kawng chhiat avangin ni danga an thlen hunah an thlen theih loh avang leh, kawng chhiat avanga mipuiin harsatna nasa tak an tawh avangin an thlavang hauh nan leh sorkar ben harh nan Total Bandh chu huaihawt an tum ta niin a sawi a, hei hi khawng taka bawhzui an tum thu a sawi bawk.
