MPCC leh ZPM Jt. Publicity Committee-in Lok Sabha MP thlanna kaihhnawihah inthlan buaipuitu Election official-te chu hleih nei taka thil ti-ah puhin an lungawilo hle tih an sawi.

0
310
views

MPCC leh ZPM Jt. Publicity Committee hian harsatna lian tham awm lovin tluang takin Lok Sabha member thlanna zawhfel emaw an tih laiin inthlan zawh hnuah hleih nei takin election official-te an chezui niin an sawi a, Inthlan ni-a Vanglaini chanchinbu chhuakah MNF party candidate Pu C.Lalrosanga symbol leh Pi Lalthlamuani, Independent candidate symbol tih sual palh ve ve a ni tih sawiin, Vanglaini chanchinbu-in an ti sual tih an hriat veleh an chanchinbu copy pawh a theih ang angin an hnuk kir leh nghal a, ngaihdam dilna a tuk thlengin an siam zui a ni an ti a, hetianga Vanglaini chanchinbu-in ngaihdam an dil mawlh mawlh chung hian MNF party chuan Chief Electoral Officer hnenah complaint an thehlut a, hemi ni vek hian Vanglaini enkawltute lakah Returning Officer chuan Aizawl Police station-ah FIR a thehlut zui a, hetih lai hian Lunglei District lama polling booth hrang hranga MP candidate-te hming list tarlan dan dik lo chungchanga MPCC leh ZPM ten CEO hnena complaint an thehluh chungchangah erawh chuan chhuifiah tura FIR thehluh chu sawi loh, a mawhphurtute laka action lak a awm thu tun thlengin hriat a la ni lo a ni an ti. Hei bakah hian Vanglaini-in election symbol an tih sual ve tho Pi Lalthlamuani symbol chungchang chu election official-te hian engah mah ngai si lovin MNF symbol tihsual zawkah chauh FIR an thehlut chu an hriatthiam loh thu an sawi bawk a, inthlanna buatsaihtu Election official-te chu State sorkarin a thunun nia a lan avangin an laka rinna nghah har an ti ta hle tih an sawi.