MPCC Media Chairman, Pu Lallianchhunga’n Central-ah Congress-in hnehna a chang a nih chuan loneitute tan Budget a hranpaa siam a ni dawn tih a sawi.

0
278
views


Vawiina Congress Bhavan-a thuthar lakhawmtute an kawmnaah Lok Sabha inthlanpui neih tura Congress Manifesto tlangzarh tak chungchang sawifiahin, Pu Lallianchhunga chuan, an Party-in hnehna a chang a nih chuan ram puma mi harsa zual thlanchhuahte hnenah kum tin Rs. 72,000 pek an ni dawn a, hei hi thla tin chhungkaw nu ber Account-ah Rs. 6,000 zela thun a ni dawn a ni, a ti. Tuna ram puma sorkar hnaruak nuai 40 zet awm pawh nakkum March thla ral hmaa hnawh khat vek tum a ni a, kum tin loneitute tan Budget a hranpaa siamsak an ni dawn a, hei hi Railway Budget a hranaa Parliament-a pharh \hin angin kumtin a hranpaa pharh \hin tur niin, hetah hian an ham\hatna tur hrang hrang dah \hin a ni dawn tih a sawi. Pu Lallianchhunga chuan, Congress kaihhruai sorkar chuan mipui an lo hrisel zawk theih nan Right to Health Care Act an duang dawn tih a sawi a, Right to Education pawh pawl 1 a\anga pawl 12 thleng huamtir a ni ang a ti a, in leh lo nei loten in an neih vek theih nan Right to Home Stay Act duan a ni dawn a, he dan hmang hian chhungkaw tinin in leh lo ngelnghet an neih theih nan hmalak a ni ang a ti.

MPCC Media Dept Chairman chuan, BJP sorkar hnuaia sorkar sawiseltute hremna pek \hin ang chu Congress sorkar hnuaiah chuan a awm ve dawn lo niin a sawi a. Tuna BJP-in NITI Aayog an kalpui dan chu \ha an tih loh avangin chak zawka hmasawnna hna thawh a nih theih nan Planning Commission chu tuai tharin, changtlung zawka thuam \hat a ni ang a ti a, hnam tenau leh sakhaw tenau zawkte zalen taka an awm theih nan Congress party chuan hma a la dawn tih sawiin, sakhaw zalenna duhtu zawng zawngin BJP leh an thurualpuite an hnawl a ngai niin a sawi.