MSCPCR in Naupangte ham\hatna chungchang Dept hotute a sawipui.

0
520
views

Mizoram State Commission for Protection of Child Rights MSCPCR in vawiin khan Department hrang hrang hotute naupangte ham\hatna tur leh an chanvo an chan theihna tura \anho dan tur a sawipui.

Aijal Club Conference Hall-a neih, Sensitization Workshop for Head of Dept tia vuah hi MSCPCR Secretary Pu Lalsangpuia’n a kaihruai a, MSCPCR Chairperson Pi Sangzuali Vanchhawng chuan naupangte chu mahni-a inveng ve thei lo an nih avangin Dan chi hrang hrang hmangin an dikna leh an chanvo humhalh sak an ni a, chung Dan dinglaite chu anihna ang taka kengkawh thei turin a kaihhnawih Department hrang hrangten an hmazawna tih tur awm \heuhte \ha taka an hlen chhuah a \ul a ni a ti a, Sorkar Department tinah naupangte khawih hmalakna a awm zel a, sorkarin policy leh programme a duan te pawh naupangte dikna leh chanvo humhalhna nena inmil, an hmasawnna tur lam hawi a nih a \ul a ni a ti. Pi Sangzuali Vanchhawng chuan hursualna laka naupangte humhimna dan POCSO Act 2012 chu dan khauh tak a nih thu sawiin, hursualna lam hawia naupangte chunga pawikhawihna a lo thlenin inngaihdam a awm \hin chu a tuartu tan pawi nasa zawk thlentu a ni \hin tih a sawi a, pawikhawihtu hrem ngei chu a tuartu tih damna kawnga rahbi hmasa ber leh thil pawimawh ber a nih avangin pawikhawihtute chu hrem ngei tur an ni a, inngaihdam chu Danin a phal lo a ni a ti.

Sawihona ah hian MSCPCR Member pathum, Dr Julie Remsangpuii Fambawl, Pi K.Malsawmzuali leh Pu J Malsawmzuala Vanchhawng te pawhin thu an sawi a, sawihona-a tel, Mizoram Police aiawhte tarlan danin, naupang kum tling lo dan kalha che te tan Police Station tinah Child Friendly Corner siam tum a ni a, tunah hian Police station tam takah zawhfel tawh a ni. Naupangten an hlimna leh an lungawi lohna ziaka an dah theihna tur Happy/Sad Box pawh zirna in hrang hranga dah turin Police te chuan hma an la bawk a, naupang dan kalha che te chungchang ngaihtuahtu tur Special Juvenile Police Officer pawh Police Station leh Out post tinah ruat an ni a, kum 18 la tling lo, dan kalha che te hming leh an nihna puanzar khapna pawh \ha taka zawm turin Police Station tinah hriattirna tih chhuah a ni tawh bawk.

Health Dept lam aiawha tel te chuan hursualna lam hawia pawikhawihna tuartu naupangte damdawi in-a endikna kawngah hmasawnna tur la awm ang ang te bawhzui zel an inhuam thu an sawi a, Law and Judicial lam aiawha tel chuan District hrang hrangah a tahtawlin Child Friendly Court siam chhoh zel tum a nih thu an sawi bawk.

Naupang zawng zawng khua leh tui \ha-a an lo puitlin chhoh theihna turin anmahni venhimna kawngah leh enkawlna \ha zawk an dawn theihna turah te a \ul apiang bawhzui an inhuam thu Department aiawhte chuan an sawi hlawm a ni.