MZP in Mizoram Kohhran Hruaitute Committee leh tlawmngai pawl hrang hrangte ngenna ngai pawimawhin Bairabi Zophaia Zofate Chawlhbuk sa tura vawiina thawhchhuah a tum chu nidang atan an khek. Ngenna siamtute hi Mizoram Kohhran Hruaitute Committee bakah Central YMA, MUP, MHIP leh MSU te an ni a, an ngenna hi MZP Executive Committee chuan nizan zanlai dar 12 khan ngaihtuahin darkar 4 deuh thaw an ngaihtuah hnu, zinglam dar 3:30 vel khan he thu tlukna hi an siam ta a ni. Hemi hnua thuchhuah an siamah MZP chuan Mizoram leh Assam inkara ramri buai chungchang tun thla ni 20, karleh thawhlehni, chawhnu dar 4-a New Delhi-a sawiho tura sorkar laipuiin ruahmanna siamte, Union Home Secretary kaihhruaina hnuaia he sawihona neih turah hian Mizoram Chief Secretary leh Assam Chief Secretary te koh an nih thu te tarlangin kil hrang hrang a\anga ngenna leh sorkar laipui ruahmanna siamte thlirin Zophaia Zofate Chawlhbuk sak an tum hun chu sawn hlaa, inbiakna neih tur nghah an remti ta niin an sawi a ni. An thuchhuahah hian MZP chuan Aizawl District Magistrate leh Kolasib District Magistrate ten Cr. PC Section 144 tlawh chhana mi panga aia tam awmkhawm khapna thupek an chhuah chu MZP te leh Mizoram Police inkara innekna thlen thei tu tur a ni tih sawiin, an lungawi lo tih an tarlang a, sorkar koh eih nan total bandh hun remchangah huaihawt an tum tih an sawi bawk. Hemi hmalama Congress Legislature Party thutlukna lo siam tawh bawhzuiin Bairabi Zophai hmun awm chilhin Mizoram Police ralthuam keng chi dah an lo ni tawh a, heng mite pui tur hian nizan thleng khan Mizoram Police ralthuam keng chi, 1st MAP, 3rd MAP, 2nd IR Battalion, 4th leh 5th IR Battalion mite bakah Health Minister, Pu Lal Thanzara duhdan angin Zophai leh Bairabi-a awm turin Medical Team pahnih ve ve tirh an ni a, heng mite hi Kolasib District Hospital tlawh chhan tura tih an ni. Nizan lamah khan Mizoram boruak a rit hle a, Aizawla awm hnam dang tam tak chu ramri kan tumin nizan khan an insaseng chhuak a, hetiang bawk hian Bairabi Zophai bulhnai, Assam ram china khawsa mizo \henkhatte pawh nizan khan ramri kanin, Mizoram lamah an in saseng lut bawk. MZP ten chawlhbuk sak an tum hun an sawn hlat thu an puan hi zinglam a nih tawh avangin tukin khan Bairabi Zophaia MZP chawlhbuk sak tumna hmunah Assam Police \hahnem tak hmuh theihin an awm a ni.
