Hetah hian Inner Line Permit nei lo, Assam Sorkar-in National Register of Citizens (NRC) a tihchhuah taka chuang lo, permit nei lova sumdawngte leh dan lova Mizo hming hawha sumdawng engemawzat hmuhchhuah niin, chung mite chu thuneitute kutah an hlan nghal a ni. MZP chuan, Sorkar leh thuneituten theih tawp chhuaha hma an lak mek lai a, nikhat thil thuah pawh hnam dang permit nei lo man tur \hahnem tak an awm chu pawi a ti hle tih an sawi a, hnam dang an mante chu permit nei lo an nih bakah an mahni leh an mahni lo in sponsor te leh hnamdang vekin an lo sponsor te an ni hlawm niin an sawi a. Ram danpuiin a bik taka Mizo hnam humhalhna tura dan a siam, Inner Line Permit(ILP) chu a nihna ang taka hmang tur leh a pekchhuah chungchangah pawh fimkhur leh zuala kalpui turin thuneitute a ngen nawn tih an sawi.
MZP President, L. Ramdinliana Renthlei chuan, tun thla ni 1-a Assam Sorkar-in NRC Draft List a tihchhuah hnuah Mizoram Sorkar leh Home Department hotuten ramria Police Checkgate leh Check Post hrang hrang thuam chaka Sipai Duty pawh dah belh a nih thu an sawi chu a tak hmuh tur awm lo niin a sawi a. Home Department hotuten ramri Check post hrang hranga sipai 10 \heuh an thawn belh nia sawite chuan tun thlengin an Duty-na hmun tur an la thleng lo nia sawiin, hemi chungchanga Sorkar hmalak dan chu an duhkhawp lo hle tih a sawi a. State pawn a\anga dan lova Mizorama lo lut veng tura Sorkar hmalakna tichak turin karleh khian ramria Police Check post hrang hrang Vairengte, Bairabi, Saiphai leh hmun dangahte MZP chu Duty a tum tih sawiin, hetah hian Police-te thlazar hnuaiah Mizorama luh tum hnam dangte chu an enfiah ve zel dawn tih MZP President chuan a sawi.
