MZP President, L. Ramdinliana Renthlei-in Rajya Sabha-a Citizenship Amendment Bill, 2016 pass a nih loh nan hma la tawk lovah Mizoram sorkar a puh.

0
233
views

Tun hnaia NESO bultuma he Bill Pass a nih lohna atana Central lam Political party hotu hrang hrang an hmuh chungchanga thuthar thehdarhtute vawiina an pawl pisaa an kawmnaah he thu hi sawiin L. Ramdinliana Renthlei chuan, Chief Minister, Pu Zoramthanga’n Republic Day dawna NGO Co-Ordination Committee-te a ngen angin a hmalakna an lo ngaihchan reng thu a sawi a, tun thlenga sorkar anga sawihona lian tham leh hmalakna hriat tur la awm lo chu mak an tih thu leh he thil hi an vei tawk lo nia an ngaih thu a sawi. L. Ramdinliana Renthlei chuan, CAB pass a nih chuan Chakma te tan Mizorama awlsam taka awm theihna kawng a in hawng dawn niin a sawi a, hemi avang hian Mizote tan a him lo hle tih sawiin he bill pass a nih lohna atana theihtawpa \an lak a ngai niin a sawi.

NESO Financial Secretary, Ricky Lalbiakmawia pawhin thusawiin Central lama political party hrang hrang hruaitu an kawmte chu hmarchhak State hrang hrang tan CAB chu a hlauhawm thu te, pass a nih loh nan theihtawpa hmalakpui tura an ngen bakah Parliament House-ah pawh a duh lo lama vote thlak turin an ngen niin a sawi a, party hruaitu hrang hrangte pawhin an thil thlente an lo hriatthiampui thu leh hmarchhak State mipuite duhdan chu an \awmpui thu an lo hrilh tih sawiin pass a nih loh nan hmalak an tum thu an lo hrilh niin a sawi bawk. Hetihlai hian political party hrang hrang hotu an hmuhte chu Prime Minister-in a umzui nghal zel tih sawiin Ricky Lalbiakmawia chuan, CAB chu Rajya Sabha-a pass a nih theih nan tunah hian BJP-in theihtawpin \an a khawh niin a sawi a, MP \henkhat pawh lam \anga siam tumin sum hmangin nasa takin an thlem mek nia an hriat thu a sawi a, hemi veng tur hian naktukah Delhi lamah NESO hruaitute chu kal leh an tum niin a sawi. MZP hotute chuan, CAB duh loh lantira hma an laknaah Hello China, Bye Bye India tih au hlaa an hmang chu Central lam pawhin an bengkhawn thu leh an ngai thu tak hle nia an hriat thu an sawi bawk.

MZP hotute chuan, CAB pass a nih loh nana theihtawpa hma an lak laiin tun hnaia sorkar laipui dawra kal Minister pakhatin NGO-te hmalakna chu atthlak a tih thu Delhi-a MZP hruaitu \henkhat kal te bulah a lo hrilh niin an sawi a, an thu hriat chuan a \hawn thu leh an rilru a tihnat thu an sawi a, Minister hian CAB chu sorkar laipuiin pass a tum lo tih te, NGO te chu a hunlaia hma la si lova, tlai khawhnuah hma la-ah a puh bawk nia sawiin, Mizo mipuite thlaphang taka an awm laia eng vanga CAB pass a ni dawn lo tih hre chunga puang zar lo nge, khawi a\anga a hriat nge tih Mizo mipuite hmaa puang turin an phut a ni.